Wohntraum
„Mei Freund hat an Wohnwagen“, sagte Herr A. zum Bezirksrichter. „Sehr komfortabel eingerichtet, mit Bad, Wohn-, Vor- und Schlafzimmer, mit Kochnische, a Traumwagen, des Wagerl, der Wohnwagen is schöner eingricht wia sei Wohnung, obwohl er in der Wohnung jährlich elf Monate und im Wohnwagen höchstens vier Wochen verbringt; aber beides kann man sich nicht leisten.
I hab a richtige Freud ghabt, wia er mi unlängst mitgnumma hat, zum Wohnwagenservice. Mir san nachher no in die Stadt reingfahrn, dort hat er den Wohnwagen von sein Auto ohkupplt und hat zu mir gsagt, i soll mirs drinn gemütlich machn, er fahrt nur was einkaufn.
I hab mi sofort in der herrlichen Mobilwohnung wia daham gfühlt. I hab ma de Schuach auszogn, hab an Kaffee kocht, am liebstn hätt i a Bad gnommen, aber man soll die Gastfreundschaft net ausnützen. Die Fenster hab i leider zuahabn müssn, weil dauernd die Autos vurbeigfahrn san, die Lastwägn im erstn Gang, die habn aufpassn müassn, dass an den Wohnwagn net anstrafn.
Nach a paar Minutn, i bin grad mit an guten Buch auf der Couch glegn, klopft wer an die Tür. In dem Wohnwagen is es so wohnlich, dass i momentan glaubt hab, es is der Briaftrager. Es war aber a Spediteur von an Möbelwagen. Er is glei mitn nassn Stiefel aufn Spannteppich gstiegn, obwohl bei der Tür a Fuaßabstreifer mit der Aufschrift ,Willkommen‘ liegt.
,Sie wünschen?‘, hab i gfragt. ,Sag, hast an Hieb?‘, hat er gsagt. ,Was stellst die denn mit den Eisenbahnwagl mittn in de Stadt eine? In so an Gassl, wo kaner vurbei kann! Ziag eahm weg, aber schnell!‘
,Es ist niemand daham‘, hab i gsagt. ,I bin nur Gast hier. Kommen S gegn Abend, der Hausherr wird dann da sein.‘
Er wollt no ausfälliger werdn, da hab i de Tür zuagsperrt und hab bei Radiomusik mei Kaffeegschirr zum Ohwaschn angfangt. Glei drauf, im Wohnzimmer hat die Uhr grad viere gschlagn, hat alles zum Wackln angfangt wia bei an Erdbebn. I schau durch an Vorhangschlitz, siech i, de schiabn mi weg. Vier Männer, Riesenlackln, zwa vurn, zwa hint, san mit dem Wagn übern Randstein gfahrn, dass ma des Häferl aus der Hand ghaut hat und habn mi in a Baustell einegschobn. De habn den Wohnwagen so schief stehn lassn, dass se der Vurzimmerteppich von selber eingrollt hat und des Ohwaschwasser bei der Tür außegrunna is.“
De Spediteure brauchen keinen Schadenersatz zu leisten. Der Wohnwagenbesitzer erhielt wegen Verkehrsbehinderung eine Geldstrafe.