Begehrtes Buch
„A Freund hat se vur längerer Zeit von mir a Büachl ausgliechn“, berichtete der 54jährige Florian N. dem Bezirksrichter. „Des Büachl ist ma sofort ohganga, nachdem i eahms gebn hab. Es hat nämlich an ganz bestimmten Platz in mein Wohnzimmer, und zwar in aner Eckn vom Verbau. Des Büachl war scho auf de Prospekt abgebildet, wo der Verbau drauf war, und drum hab is glei mitkauft. Wann gibst ma denn mei Büachl zruck?’, hab i unlängst mein Freund gfragt.
Sagt er: ,I hab von dir a Büachl? Wia haaßts denn?’
Wäu i net genau gwusst hab, wia des Büachl haaßt, was ma der Möbelhändler mitgliefert hat, hab i ma zagn lassn, wia dick des Büachl is, was er hat. Er hat ma zagt, wia dicks is, hab i gsagt: ,Ja, des könnt meins sein.‘
,I habs no net glesn‘, hat er gsagt.
Sag i: ,I aa net. I wülls wiederhabn. I geh glei mit dir.‘
Mir kumman in sei Wohnung, siech i nirgends a Büachl. Dann hat er sei Schlafzimmer aufgmacht, hab i gsehn, des Büachl steht über de Bettn. Nebn aner Obstschaln.
Sag i: ,Des is.‘ Sagt er: ,Des is?‘ Sag i: ,Des is.‘ Sagt er: ,Lass mas no a Wäu, i habs no net glesn.‘ Sag i: ,Mach kan Schmäh, du wüllst es net hergebn, weils da herpasst.‘ Sagt er: ,Ah.‘ Sag i: ,Lüag net. I hab dei Schlafzimmer im Prospekt gsehn. Da steht genau durt a Büachl, wo jetzt meins steht. Neben aner Obstschaln.‘
Mant er: ,Hörst, wann i des wegnimm, is des ganze Zimmer nackert.‘
Sag i: ,Na, und bei mir? Du bist rücksichtslos, herst. Nimm dir an Innenarchitekten, wannst di schmeißn wüllst, aber net mit mein Büachl.‘
,Von mir aus‘, hat er gsagt. ,Nimm dirs. I schau, dass i anders kriag.‘
Den Moment is sei Frau hamkumman. ,Was ist mit dem Büachl?‘, hat sie gfragt. Sagt er: ,Des ghört eahm.‘ ,I lass ma do net mei Schlafzimmer ausrama‘, hat sie gsagt und wollt mas wieder wegnehma. I hätt ihrs vielleicht gebn. Aber Gewalt hass i. Sie hätt wenigstens bitte sagn könna. So is zu dera Raferei kumma, bei der des Büachl ruiniert wurde. Es war aber nur eine Attrappe. Es herrscht wieder Friede zwischen den Familien.