Gleichmäßige Abnützung
„Unlängst hat mi der Herr Ebreichsdorfer in sein Auto mitgnumma“, berichtete Herr V. dem Bezirksrichter. „I wollt mi nebn eahm setzn, aufn Beifahrersitz, aber der Ebreichsdorfer hat mi ersucht, dass i mi schräg hinter eahm setz.
,Wieso das?‘, hab i gfragt. ,Is Ihnen meine Nähe unangenehm?‘
,Aber überhaupt net‘, hat er gsagt. ,Es is nur so: Ma muass des Auto möglichst gleichmäßig belasten. Wann nie wer hint sitzt, werdn de vurderen Federn überbeansprucht, und hintn bleibns wia neich. Aus dem Grund, soll ab und zu wer hintn sitzn.‘
,Des versteh i‘, hab i gsagt. ,Warum fahrn S denn jetzt gar so langsam?‘
,Weil i jetzt a Stückl nur im ersten Gang fahr‘, hat der Herr Ebreichsdorfer gsagt. ,Der erste Gang wird fast nie verwendet, meistens der dritte. Wegn der gleichmäßigen Abnützung fahr i aber ab und zu nur mitn ersten Gang. Könntn Sie hinten bitte, a paar Mal de Fenster auffe- und obedrahn? De hintern Fenster san meistens zua, solln aber ebenfalls benützt werden, sunst rostns ein.‘
Der Ebreichsdorfer hat mi dann ersucht, dass i mi auf de hintern Sitz a bissl hutsch, und dass i nachher so tua, wia wann i schlafn tät, weil dadurch werdn de Polster gleichmäßig abgenützt. I hab des mitgmacht, i war froh, dass er mi mitnimmt.
Zwa probeweise Notbremsungen hab i a guat überstandn, dass i mi in Kofferraum setz, hab i eahm ausredn könna, weil i gsagt hab, i tua dafür viel rauchn, wodurch de Aschenbecher benützt werden, und eventuell brenn i eahm aa auf Wunsch a Abnützungsloch in de Polsterung. Grad, wia ma mit aufblendete Scheinwerfer durch de pralle Sunn gfahrn san, es war richtig haß im Auto, weil er zwecks Funktionsprobe de Hazung voll aufdraht ghabt hat, hab i durch de Windschutzscheibn bemerkt, dass uns de Polizei verfolgt. Mir san eahna net auskumma, se san uns dicht hinter unserer vurderen Stoßstangen nachgfahrn, und er hat dann a Schippl Straf zahln müassn. Des war nämlich grad de Zeit, wo er drei Kilometer weit nur in Retourgang gfahrn is. Weil der Retourgang so selten benützt wird.“
Die Auseinandersetzung mit den Polizisten, die wenig Verständnis für Ebreichsdorfers Fahrweise zeigten, brachte Letzterem auch eine Anzeige wegen Gefährdung ein. Die Verhandlung wurde vertagt.