Eine momentane Schwäche

„Wamma beim Eisenrauch was erreichen wüll, muass ma krank sein“, sagte Herr B. zum Bezirksrichter. „Der Herr Eisenrauch is a starker Hypochonder, mit a Schippl eingebüldete Krankheitn, und akzeptiert nur Leit, de was ebenfalls krank san. A Gsunder is für eahm so guat wia gsturbn, mit dem redt er gar net.

Unlängst wollt i ma vom Herrn Eisenrauch 500 Euro ausburgn, war aber leider an dem Tag pumperlgsund. Damit i a bisserl krank ausschau, hab i an dem Tag nix gessn, bin statt mitn Aufzug de drei Stöck zu eahm zfuaß ganga, und hab vur seiner Tür no gschwind a paar Kniebeugen gmacht, damit i ja ganz ermattet ausschau.

,I glaub i dermachs nimmer lang‘, hab i zum Eisenrauch gsagt, wia er ma de Tür aufgmacht hat.

,Wann i net bald zu an Spezialisten geh, is oha mit mir. 500 Euro kosts halt, de Untersuchung.‘

,Des is a momentane Schwäche‘, hat der Eisenrauch gsagt und hat mi in an Raum gführt, der hat ausgschaut wia a Apothekn, es war aber sei Wohnzimmer. ,Mit so aner momentanen Schwäche leb i scho seit Jahren. Da, nehmen S des Pulver, und trinkn S a Glas Wasser dazua.‘

Während i des Pulver gschluckt hab, hat ma der Eisenrauch in Puls gfühlt. ,Gspürn S, wia der rennt?‘, hab i gsagt. ,Und so geht des immer bei mir, Tag und Nacht. Da gibts ka Pause. I muass zu an Spezialisten und hab im Augenblick ka Geld.‘

,Für den Augenblick kann i Ihna helfn‘, hat der Eisenrauch gsagt und hat ma a bittere Tinktur auf a Stückl Zucker tropft. ,Essn S den Zucker, und trinken S a Wasser dazua. Gegn meine Herzbeschwerdn habn Se direkt a Spurtlerherz.‘

,Herr Eisenrauch‘, hab i gsagt. ,I brauch 500 Euro. I hab so starke Schmerzen.‘

,De hab i seit Jahrn‘, hat der Eisenrauch gsagt. ,I gib Ihna a Zapferl.‘

,Da gebn S ma liaber an Zucker‘, hab i gsagt. ,Und bitte, Herr Eisenrauch, helfn S ma, dass i zu an Spezialisten kumm! Ich bin ja nur mehr ein Schatten meiner selbst!‘

Drauf hat der Eisenrauch de Rollo obelassn, damit mi net de Sunn anscheint und i kan Schattn wirf, und hat ma no de verschiedensten Pulver, Kapseln und Tablettn aufdrängt. I habs alle gnumma, mit sehr viel Wasser, weil i ghofft hab, er gibt ma no a Geld a.

Wia ma dann schlecht wurdn is, i hab ja nix im Magn ghabt und nimm nie Pulverln, des is ja alls Gift, wollt er mia sogar a Injektion verabreichn, was nur ein Arzt darf. Mit letzter Kraft hab i mi zur Tür gschleppt, er is ma nach und hat mi im Bad mit aner Nasenklemme und an dünnen Schlauch traktiert, anscheinend wollt er ma in Magn auspumpn. In operativer Verzweiflung hab i eahm in Finger bissn. Schwamm drüber, Herr Eisenrauch, burgn S ma heut de 500 Euro?“

Eisenrauch borgte das Geld her. Der Prozess, Herrn Eisenrauchs Versicherung wollte für die Fingerverletzung nichts bezahlen, endete mit einem Vergleich.