Auf großem Fuß leben
„ Im Bezirksgericht. Ein Herr zu einem anderen: „ Wegn was san S denn da?“
„ Wegn aner Kreditsache. I leb halt auf großem Fuß.“
Der Erste: „ Na, da gehts Ihna fast so wia mir. I bin nämlich aa wegn meine großn Füaß da. I hab a AchtavierzgerSchuachgröß, wann i Galoschn anhätt, könnt i damit Wasserski fahrn. Leider hab i aber aa an dämlichen Nachbarn, der was a so a klans Hirn hat, dass es mit Leichtigkeit in an Babyschuach unterbringan, sogar dann, wann bereits a Babyplattfuaßeinlag drin liegt.
Mir wohnan am Fuße des Ötschers, und der Mann büldt se ein, dass bei uns ein sogenannter Yeti lebt, a Schneemensch, der was ausn Himalaya abstammt, und von dem er scho mehrmals de Fußabdrücke gsehn habn wüll.
Wahrscheinlich hat er de meinigen gsehn, weil i geh natürlich aa im Schnee furt; i werd do net wegn mein angschüttn Nachbarn in ganzn Winter dahambleibn, nur damit er net glaubt, mir habn an Yeti bei uns. Er hat sogar vermutet, dass des a weiblicher is, a sogenannte Jetti- Tant, und hat se dazua a mörderische Idee einfalln lassn.
Er hat auf dem Weg, wo i allerweil von an Wirtshaus hamgeh, mittn in an Wald, a Gruabn ausghobn, an Meter lang und achtzg brat, und hat de zwa Meter tiafe Gruabn sodann mit Ästen bedeckt. Nachdem natürlich in an verschneiten Wald sogar a Yeti, wanns an gabert, sofort überziagert, dass da was net stimmt, und möglicherweise auf Zehenspitzen, de was bei an Yeti no immer so groß wia a Schöpflöffl san, um de Gruabn umadumgingert, hat er über de Astln zirka vier Kilo feinsten Kunstschnee versprüht. I geh um a zwölfe in der Nacht ham, waß natürlich net, was gschlagn hat, und denk ma nur, komisch, der Schnee schaut wia a Schlagobers aus, wüll eahm kostn, und plumps, lieg i scho drin. Glei drauf is scho mei Nachbar kumma, er hat mi im Schein einer Fackel sofort erkannt und hat trotzdem obegschrian: , YetiAff, liegst untn?‘
I hab den Affn einklagt. Weil wann i mit an Affn hamgeh, fall i öfters in a Gruabn. Aber schimpfn lass i mi net.“
Der Grubengräber: „ I hab nur obegruafn: , Je, tiaff liegst untn!“Das Verfahren wurde eingestellt.