Eine gute Partie
Bezirksrichter zu einem Heurigensänger: „ Wenn Sie nicht singen können, geben Sie Ihren Beruf auf! Es ist unerhört, einem Heurigengast, der sich entspannen will, solch ein jämmerliches Geheul zuzumuten!“
Heurigensänger Paul S.: „ Uijegerl! Anscheinend warn der Herr Rat amal bei uns und habn mi singa ghört, sunst tätn S mi net gar so zsammschimpfn! Aber jetzt, wo niemand da is, kann i Ihna in der Gham verratn: I sing wia a Lercherl! I hab a Stimm wia der Peter Alexander, nur dass i halt net immer so gerührt mit de Wimpern zwinker wia der Alexander. Aber i hab a ausgebüldete Stimm! I bin a Jahr lang zu an Gsangslehrer in de Schul ganga!“
Richter: „ Dann verstehe ich nicht, warum Sie immer wieder bei Ihren Darbietungen in so ein entsetzliches Gegröle verfallen!“
Paul S.: „ Da is mei Gsangslehrer dran schuld. I hab ma nämlich mit eahm ausgmacht, dass i eahm pro Stund 70 Euro zahl. Aber erst, wann i mit der Ausbüldung fertig bin, weil i nämlich a reiche Partie in Aussicht ghabt hab. Leider is aus dera Hochzeit nix wurdn, weil mei Schwiegervater in spe lange Jahre schmutzige Geschäfte mit großem Reingewinn gmacht hat und dann in Häfn kumma is. Dadurch hab i mein Gesangslehrer net zahln könna. Bitte, i hab no an reichn Onkl, den hätt i anpumpn könna, aber den Mann heb i ma für meine altn Tag auf, und wia mi der Gesangslehrer klagn wollt, hab i zu eahm gsagt: , Hurchn S zua, i machs wia a jeder anderer, der was a War net zahln kann! I gib Ihna Ihre Leistung wieder zurück! I tua so, wia wann i bei Ihna nie singa glernt hätt! I vergiss an jeden Ton, den was S ma beibracht habn!‘
Und des halt i jetzt ein. Net immer, aber er kummt mi manchmal kontrolliern. Und wann i siech, dass mei Ge-
sangslehrer das Lokal betritt, fang i zum Dilettiern an, dass ma glaubn könnt, a Kehlkopftuberer imitiert in Caruso. I hab sunst ka Ruh so, Herr Rat! Leider hat se der Mann neilich als alternder Liebhaber getarnt und is mit aner großen Seidenblume im Knopfloch in unser Lokal kumma, wodurch i sei Gsicht net glei gsehn hab. Und wia i eahm mit einschmeichelnder Stimme des alte Pola-Negri- Liad , Du bist mein Ruin‘ vurtrag, gibt er se zu erkennen und sagt: , Jetzt san S fällig, Sie verwenden meine Lieferung!‘ Dadurch ist es dann zu Handgreiflichkeiten gekommen. I hab wirklich kane Milderungsgründe? Mir habn heut a schöns Wetter! Können S net des als mildernd rechna?“
Zur Einvernahme des Gesangslehrers wurde die Verhandlung vertagt.