Derselbe Geschmack
„ Alsdann, de Gschicht war a so“, berichtete Herr E. dem Bezirksrichter: „ I kumm neilich auf d Nacht zum Herrn Nettlinger fernsehen, er wohnt bei uns im Haus, und wann mei Frau des erste Programm sehn wüll und i was im zweitn, schickts mi immer zu eahm obe. Weil sie waß, er hat mein Gschmack; zum Beispiel am Sonntag , Tatort‘ mitn Harald Krassnitzer, wegn dem bin i neilich zu eahm obeganga, hab i scho gsehn, er macht a bissl a Gsicht.
, Na, hoffentlich funktionierts heut‘, hat er zu mir gsagt, und hat mi niedersetzn lassn, es is immer saukalt bei eahm, i glaub, er macht de Fenster auf, bevur i kumm. , Es is nämlich jedn Moment das Ausfallen der Bildröhre zu erwarten!‘
, Ja‘, sag i. , Wia kumman S denn drauf?‘ Mant er: , Durch gewisse Berechnungen. A so a Fernsehröhrn halt im Schnitt zehntausend Stunden, des san grob gnumma fünftausend Fernsehabende, und heut is scho der Fünftausendundeinste. I kann mi irrn, aber wann de Röhre dunkel wird, net dass S dann bes auf mi san.‘
, Na‘, sag i. , Was soll i machn? Wanns aus is, is aus. Schlimmstenfalls spül i mit Ihna a Partie Remme, weil aufn Anser bin i heut überhaupt nix haß.‘
Mant er: , Des kann leider aa danebengeh. I hab nämlich vur a paar Monat meine ganzn Glühbirnen ausgwechselt, und de habn aa nur a gewisse Brenndauer. Nach meine Berechnungen is heute der Tag, wos in meiner Wohnung finster wird.‘
Sag i: , Hörn S, Se san heute wia verwandelt! Se kumman ma wia a neue Glühbirne vur, so ausgwechselt san S! Was führn S denn da auf?‘
Den Moment hat scho sei Fernseher zum Spüln aufghört, i hab in Sack griffn, um meine Remmekartn, und in dem Augenblick is beim Nettlinger aa des Liacht ausganga. Er hat mi mit an Wachsstumpferl zur Ausgangstür gführt, und in sein Vurzimmer is auch de Kerze erloschen, wodurch i ma an sein Schuachkastl unhamlich des Schienbanl anghaut hab. I vermut, des Ganze war a vorprogrammierte Brenndauer, damit i nimmer zu eahm fernsehn kumm, wahrscheinlich hat er a Schaltuhr verwendet. Der Mann muass a Schmerzensgeld brenna, von mir aus soll ers in Ratn brenna; de Brenndauer kann der Richter bestimma.“
Herr Nettlinger wird einvernommen werden.