Blödheit gehört bestraft

„ Bledheit ghört bestraft“, berichtete der Zeuge Kurt L. „ I sitz damals mit an fremdn Herrn beim Heurichn an an Tisch, kummt a Zeitungsverkäufer eine, so aner, der was a mit Heftln geht. Sagt der Herr, der was neben mir gsessn is, zu dem Kolporteur: , Sagn S, habn S außer de bledn Kriminalromane nix anders? So a bisserl was Erotisches, mit Sex?‘

, O ja‘, hat der Verkäufer gsagt. , Aber des kann i Ihna so offn da net beim Tisch verkaufn. De Leut schaun her, und in de Heftln san lauter Nahaufnahmen, da siecht ma scho von der Weitn, was drauf is!‘

, Geh, mach kane Gschichtn‘, hat mei Nachbar gsagt. , Gib her so a Heftl, schiabs in a Zeitung eine, und de Sache is okay. Soda, ja, i siech schon, i siech schon, des is des, was i man; was kriagst? Zwanzig Euro? Bist deppert? Um des Geld schau i mirs in natura an! Vül zu teuer! So a Weh bin i wieder net auf de Büldln. Gebrauchte hast a? Was haßt gebraucht? Ah so, eintauschte. Was kostn de? An Fünfer? Guat, sollst sehn, dass i a Mensch bin. Gib her a paar. I bin ja ka Voyeur, vastehst. Soda, schiab mas da in de Zeitung eine, braucht net glei a jeder sehn, was i hab. De Köllnerin speanzlt eh scho ume. Da hast fünf Euro, alter Sextandler, habedere.‘

A paar Minuten später“, berichtete der Zeuge weiter, „ hat der Herr neben mir de Zeitung aufgschlagn und wollt ma de Heftln zagn. I hab a bissl umegspeanzlt, mi intressiert ja so was überhaupt net, und da hab i sofort gsehn, dass der Kolporteur den Herrn, versehentlich oder mit Absicht, übernumma hat. In der Zeitung san nur Prospekte von an Reisebüro und von diverse Einrichtungshäuser glegn.

, Kränkn S Ihna net‘, hab i zu dem Herrn gsagt. , Schaun S, da kummt der Kolporteur von der , Kronen Zeitung‘. Da san immer schöne Damen drin, de ihren Weg nach oben bestreiten, müassen S denn unbedingt de Nackertn aus de Magazine sehn!‘

Aber er war net zum Beruhigen, er hat sofort zahlt und is mit den Worten , den derwirg i jetzt – so a Frechheit!‘ den Zeitungsverkäufer suachn grennt.“

Der geneppte Käufer wurde, als er den Kolporteur bei einem anderen Heurigen aufgeregt und voller Wut zur Rede stellen wollte, von einem Hausangestellten aus dem Lokal gedrängt und dabei leicht an der Stirn verletzt.

Das Urteil lautet schließlich: Freispruch für den Hausangestellten.