Die Lehre von den Bienen
Ich
kenn an, der is a Imker“, berichtete Herr A. dem Bezirksrichter. „ Der Mann halt se Bienen und zwar millionenweise, zirka hunderttausend in an Stock. Und, wamma se ehrlich san, er nutzt de Viecherln aus. Er gibt eahna an büllichn Zucker zum Fressn, und de machn eahm an Honig draus. Net nur des, er hat de Bienen sogar soweit ohgricht, dass de für eahm auf de angrenzendn Wiesn fliagn und durt aus de Bleamerl in süaßn Saft auszuzln. De Bauern erlaubn des nur deshalb, weil die Bienen eine Geschlechtsfunktion ausüben und beim Nektarsammeln de Pflanzn befruchten. Sunst lassertn de Bauern de fremden Bienen gar net auf eahnere Wiesn, i kenn des. Legn S Ihna auf einzäunte Wiesn, sag ma, mit an Madl, was Ihna der Bauer derzählt! Da können S hundertmal in befruchtender Weise a Geschlechtsaktion vurhabn. Aber vur Gericht samma nur deshalb, weil i den Imker neilich ersucht hab, dass er mi zu de Bienenstöck mitnimmt.
Er hat ma an Schutzanzug gliechn, damit i net gstochn wia und a Paar Handschuach, wias de Chirurgn beim Operiern tragn. Und dann hat er ma no an Gazeschleier übern Kopf bundn, mit an Lückerl drinn, damit i a Pfeifn rauchn kann. Weil auf Rauch sans allergisch, de Bienen, da reißns oh, wia früher de Nichtraucher aus an Raucherabtäu.
So hat er mi ausgrüst und is mit mir zu de Bienenstöck ganga. De Exkursion wäre sehr lehrreich geworden, und i könntert Ihna no vül mehr über de Bienen sagn, wann ma net glei beim Pfeifn- anzündn des entsetzliche Unglück passiert wär. Wia i nämlich mit mein Feuerzeug in de Näh von dem Gazeschleier kumma bin, is der sofort in Flammen aufganga und is weggflogn wia a Spinnwebn. Glei drauf warn de Bienen da, und de hättn mi gstochn, wanns net der Imker mit wuchtigen Handschlägen von mein Gsicht weggjaugt hätt. So vül Watschn hab i mei ganz Leben net kriagt! Er hat mi minutenlang ohtetschnt, bis er mi aus der Gefahrenzone ghabt hat. Und da wüll er no, dass i eahm dankbar bin? Des is ja a Ironie, de Bienen hättn mi aa net mehr zuagricht wia er.“
Der Imker erhielt eine Geldstrafe. Der Gesichtsschutz darf keinesfalls aus leicht entflammbarem Material bestehen.