Auf einer Lichtung

Bezirksrichter

zu dem Wald- und Forstgehilfen Severin K.: „ Sie haben vor einiger Zeit einen Hirsch durch den Wald getragen?“

Severin K.: „ Ja. Zum Präparator. Der Förster hat damals an Superklachl erlegt ghabt. An Sechzehnender oder gar an Achtzehnender, i habs net zählt. I bin mit dem ausgnummenan Hirsch durchn Wald ganga, damit er zum Ausstopfn kummt, er war fürs Naturgeschichtliche Museum bestimmt.

Eigentlich hätt er ja ins Kunstgeschichtliche ghört, weil des Ausstopfn a Kunst is, und wia tragt ma so an Hirsch am bestn, der was nur mehr ausn Fell und aus de vier Haxn und ausn Schädl besteht? Ma hängt sen um wia an Überziager und rennt damit durchn Wald.

Und wia i so hirschverhüllt auf aner Lichtung steh und mitn Gweih am Kopf umadumschau, bemerk i auf amal, dass wer auf mi schiaßt. I habs pfeifn ghört, und hab mi sofort hinghaut, hat aner hintn , Hurra!‘ gschrian, weil er anscheinend glaubt hat, er hat mi erlegt. Wia i dann wieder auf bin, hat er no zwamal nachpfeffert, und wann i mi net wieselflink mitsamt mein Fell auf an Bam rette, hätt er ma vielleicht in Garaus gmacht.

Wia er aber gsehn hat, dass i auf an Bam sitz, hat er se so stark de Augn griebn, dass eahm de Augngläser obegfalln san, und er für an weitern Schuss nimmer fähig war. Des Ganze war a Straf des Himmels, weil i an an Sundoch garbeit hab. Ma soll an an Sundoch net arbeitn, des is gegn des erste Gebot, und unter der Wochn können S nie an Sonntagsjäger in de Händ falln. So einfach is des eigentlich.“

Bezirksrichter: „ Wieso sind Sie denn eigentlich auf der Lichtung herumschauend gestanden?“

Severin K.: „ Weil ich ein kleines Geschäftchen zu erledigen hatte, mit Verlaub, das wird doch noch erlaubt sein, Herr Rat. Und da schaut ma halt, ob aa kaner zuaschaut. I mach so was nie wieder, der Mann hat ja so a schlechtes Zül ghabt, dass er mi fast entmannt hätte. Na, des war was gwesn, wann i als Hirschkuah zu dem Präparator kumma war! Unvorstellbar.“

Der Sonntagsjäger wurde vor Gericht wegen Gefährdung zu einer hohen Geldstrafe verurteilt.