Farbenblind
Ich bin farbnblind“, sagte der 59- jährige Karl T. zum Bezirksrichter. „ Grün siech i braun.
Der Kralowitzer, des is mei Nachbar, hat ma erlaubt, dass i ma während seiner urlauberischen Abwesenheit an Schnittling von sein Balkon ohschneid. Dafuar giaß i eahm de Blumen, soweit is dergleng, und wann i an Schnittlauch brauch, dann fahr i mit der Scher ume und schneid mirn oh.
Neilich wollt i mir a Schnittlingsoß machn, und dafür brauch i natürlich a größere Menge Schnittlauch. Drum hab i anständig zuagriffn, wobei i sagn muass, dass des Schnittlingsgefäß von Blumen verdeckt is; i hab den Schnittling mit aner Hand packt und hab mit der zweitn den ganzn Busch abgetrennt, bis obe zum Grund. Den Moment hab i scho an Schra ghört, und des is der Grund, warum ma heut da san. Ersuche um Freispruch! I bin farbnblind, Se werdn do net an unschuldigen Menschen verurtäuln, Herr Rat. I waß, es klingt bled, aber sowas kann doch passiern. Wia haßts so schön im Lotto? Alles is möglich.“
„ I bin damals bei mein Onkl gemütlich aufm Balkon gsessn“, berichtete der Neffe des Herrn Kralowitzer, der 24- jährige Peter Struwwel, dem Richter. „ I hab nämlich de Schlüssln für de Wohnung und geh mi manchmal sunna, weil de Damen wolln kane blassn Männer. Und wia i so sitz, packt mi auf amal wer bei de Haar, ziagt mi in d Höh und schneidt ma mit aner Scher a Totalglatzn. Es war a fürchterlicher Augenblick, i hab glaubt, i wia skalpiert. Jetzt redt se der Herr Nachbar auf an Irrtum aus, bietet ma a Friedenspfeifn an und sagt, de Verwechslung war biologisch möglich, weil i a sehr stark emporsprießendes Haupthaar ghabt hab. Des stimmt überhaupt net, da kann i hundertmal StruwwelPeter haßn. Des war a Racheakt, weil i kane Blumen giaß.“„ Der Vorwurf der Rache ist lächerlich“, zeigte sich Herr T. erbost. „ I hab ma de ohgschnittenan Haar auf a Schneidbrettl zerkleinert und hab mas in de Soß einegstraht. Da is der Hausmaster Zeuge, a gnaschtiger Mensch, der war Zins kassiern, den hab i a Mäulvoll kostn lassn!“
Der Hauswart wird einvernommen werden.