Der Wettkönig
Also,
de Gschicht is a so“, berichtete ein Zeuge. „ Der Herr Schmieringer ist an Meta achtadachzg groß, und jedes Mal, wann er ins Wirtshaus kummt, haut er se bei der Tür in Schädl an. Wirklich immer – wia des Amen im Gebet.
Der Herr Schmieringer hat Gott sei Dank an banharten Schädl, Herr Rat. Obwohl er se jedn Tag de Birn anhaut, siecht ma bei eahm überhaupt nix. Der Türstock aber is interessanterweis an der Stell, wo der Herr Schmieringer immer ansteßt, scho ganz ohgsplittert.
Wann mir so beim Schnapsen sitzn, und der Herr Schmieringer taucht draußn auf, dann legn mir de Kartn hin und sagn: Jetzt wirds glei wieder krachen. Glei drauf machts den obligaten Pumperer, der Herr Schmieringer schreit: , Kreizteife, scho wieder hab i mi anghaut!‘ Und mir spüln weida. Es is immer dasselbe. Ma könnt scho fast de Uhr danach stelln.
Unlängst sagt der Benesch zum Jelosic: , I wett mit dir um an Liter Wein, heut haut se der Schmieringer net den Bluzer an. Weil heut hat der Wirt de alte, zrissene Türdackn wegghaut. A Neiche is no net da, und dadurch gwinnt der Schmieringer mindestens zwa Zentimeter Bodnabstand.‘
, De Wett gült‘, sagt darauf der Jelosic, , der Schmieringer haut se in Schädl sogar bei an Scheunentor an. Da bin i mir sicher.‘
Der Liter is am Tisch kumma, der Schmieringer taucht auf, und weil er de Türdackn gwehnt war, is er ausgrutscht und der Läng nach ins Gschäft einegfalln. Stelln Sie sich vor, sein Schädl hat er se dermaln glei am erstn Tisch anghaut.
Jetzt is de Streiterei anganga. Der Benesch hat gsagt, er hat de Wett gwunna, der Jelosic hat gsagt, er hats gwunna. Zum Schluss habn sa se gegnseitich ohgwatschnt, aber ordentlich.“
Die Beschuldigten Benesch und Jelosic waren nicht erschienen. Der Richter verurteilte beide in Abwesenheit wegen Raufhandels zu je 400 Euro Geldstrafe.
„ A Bitte hätt i no“, sagte der Zeuge. „ Könnten Sie net als objektiver Richter entscheiden, wer von de zwa de Wett gwunna hat? Damit de Streiterei endlich aufhört. Dann habn ma wieder a Ruah beim Schnapsen.“
Der Bezirksrichter schüttelte den Kopf.