Geschniegelt und gestriegelt
Nie
wieder lass i an Bsoffenen in meiner Duschkabin duschn“, sagte Herr E. zum Bezirksrichter. „ Bei nüchterner Betrachtung muass ma nämlich sagn, dass so a Kabin nur für Nüchterne bestimmt is. Des hat se neilich bewiesn, wia i in Firlifanzler, an Spezl von mir, bei mir unter de Dusch lassn hab.
Er kummt unlängst zu mir, scho schwer im Öl, und ersucht mi, ob i eahm brausn lass, weil der a Rendezvous mit aner Frau hat und dieser Frau nur in gereinigtem Zustand entgegentretn wüll.
I hab nix einzuwendn ghabt, weil i kann verstehn, dass aner mit an benzolartigen Hautgeruch net gern zu an Stelldichein geht, und hab eahm des kleine Erfrischungsbad erlaubt. Er hat se mit an Stückl Toilettsaf, des was er bei an Wirtn auf der Toilett mitgehn hat lassen, in meine verglaste Kabine begeben, und i hab de Duschtür hinter eahm zuagmacht, wobei i ma dacht hab, wia guats is, dass der , dritte Mann‘ nimmer durch de unterirdischen Kanäle schleicht, weil wann er in Firlifanzler sei Duschwasser übern Schädl kriagat, reißt er sofort al Alkoholvergiftung auf.
Sekunden später hab i aber meine entgegenkommende Güte, Firlifanzlers Körper ein neues Aussehen zu geben, bereits zutiefst bereut. Es hat nämlich der Firlifanzler in meiner Kabine zum Wackln und zum Hin- und Herfalln angfangt, dass ma glaubn hätt könna, a Prügl Holz wird drin umadumghaut. Eigent- lich war de Szenerie sehr lustig, wanns net so traurig gwesn wär.
Er hat se amal links und amal rechts an de Wand gschmissn, hat se buckt und is untn umadumkräult wia a Nackerter, der was in an altn Telefonhüttl an Euro suacht.
Dabei hat er gekrächzt und gestöhnt, und zum Schluss is er ma bei der zuagmachtn Tür außegfalln wia a Steinzeitmensch, der was in Wachs gossn is. Nie wieder lass i an Bsoffenen zu mir unter de Dusch, de was i mitn Wohnungsverbesserungskreditno zehn Jahr lang ohstottern muass!“
Franz Firlifanzler („ I war standfest wia a Gardesoldat! Aber des Wasser hat neunzig Grad ghabt, und i hab de Duschtür net aufbracht!“) lässt durch einen befreundeten Handwerker demnächst die Duschbrause reparieren.