Nur im Doppelpack
Ich hab scho gwusst, dass manche mit an Rausch alles doppelt sehen“, sagte Herr K. zum Bezirksrichter. „ Aber dass se aner so irrt, des hätt i nie glaubt.
I steig neilich in an Haus in an sehr kleinen Aufzug ein, der was nur für zwa Personen zugelassen war, steigt aner zua, ordentlich fett, und sagt: , Oh, pardon, da san scho zwa drinn, da muass i warten.‘
Drauf zahr i eahm eine und sag: , Fahrn S nur mit!‘ Mant er: , Sehr lieb, meine Herren, aber i kenn de Kraxn, wias überladn is, bleibts stehn!“
Jetzt bin i ausgstiegn, holt er mi zruck und sagt: , Burschn, es sads Brüader, es sads ma sehr sympathisch, glaubts ja net, i hab was gegn eich. Es is nur so, es sads ja net de Schwächstn. A jeder von eich hat leicht neunzg Kilo, wann net mehr, und mit de dickn Wintermäntel, nichts gegen den Partnerlook, da könn ma hängableibn. Jetzt lachts alle zwa und kicherts mit eicherer hochn Stimm. Seids ihr eineiige Zwillinge? Freut mich, euch kurz kennenzulernen. Aber wamma zu dritt fahrn, kanns a lange Bekanntschaft werden, weil der Hausmaster is heut net da, und bis de Feuerwehr kummt, dauert es Stunden.‘
Jetzt is ma z bled wurdn, i hab an Knopf druckt, und mir san gfahrn. Mant er: , Es sads ma zwa Gschaftlhuaber, a jeder muass mit an Finger druckn; na hoffentlich geht des net schief. Ja, ja, fesche Burschn seids es zwa.‘
Bei diesen Worten is er zrucktamelt und hat mitn Ellbogn in Halteknopf druckt. Worauf er sofort vom freundlichen Angeheiterten zum rabiaten Bsuff wurdn is und gschrian hat: , Jetzt hammas! Es bladn Bemstln wards natürlich gscheiter wia i, aber es habts nur a Hirn mitanander! Oder stimmts vielleicht net?‘
Wia i gsagt hab: , Des stimmt!‘, hat er se ghäkelt gefühlt und wollt mein Bruadern ane obehaun. Er hat eahm aber net troffn und hats dann bei mir probiert, worauf eahm, wia er glaubt hat, mei Bruader ane gschmiert hat. I gibs zua, des war i, beantrage aber Freispruch wegen beengender Notlage.“
Der damals Betrunkene („ Schämen Sie sich! Sie verleugnen Ihren Bruder! Sie sollten zu einem Psychiater!“) zog schließlich seine Klage zurück.