Ein entwaffnendes Lächeln
Alsdann,
de Gschicht war a so“, berichtete Herr B. dem Bezirksrichter. „ I bin neilich als Polizist verkleidet auf an Kostümball ganga. Die Verkleidung hab i bei an Onlineversand günstig kriagt und hat täuschend echt ausgschaut. Und weil ma mit an Revolver naturgetreuer ausschaut, hab i ma von mein klan Buam in Stopplrevolver ausburgt, wobei i eahm aber leider net um Erlaubnis gfragt hab.
Na, i geh um a achte auf d Nacht ausn Haus, scho in der Maschkerad, weil der Ball glei bei uns um de Eckn war, kummt ma mei Gschropp nachgrennt und wüll sein Revolver zruckhabn.
I debattier mit eahm, versprich eahm, dass i nix ruinier, wird der Bua wüld, reißt ma sei Spülzeug aus der Revolvertaschn und rennt furt. Grad wia i ma denk, du wilder Bub, du, jetzt kann i ohne Krachn tanzn, kummt a Herr zuwe und schreit: , Weit samma kumma! Net nur, dass se de Wachleit bei an Überfall von den Gangstern fessln lassn, lassn sa se aa scho von de klan Kinder ohstiern! Wia können S Ihna denn von den Buam in Revolver wegnehma lassn? San Se meschugge?’
Sag i drauf: , I bin leider ka Polizist. Für den Beruf fehlt ma jede Eignung. Schreit er: , Des siech i eh, dass Se dafuar net geeignet san! Se feige Laus! Und so was wird von unsere Steuergelder derhaltn! Wo bleibt da de Sicherheit des Bürgers, wann Ihna scho a Fünfjahricher entwaffnen kann.’
Drauf wollt i eahm mit an entwaffnenden Lächeln de Angelegenheit erklärn, aber er hat zum Renna angfangt, hat gschrian: , Aufhaltn! Des Kind hat an Revolver! und hat mein Buam unterm Haustor derwischt. Mei Bua hat eahm sofort a paar auf de Schienbanln ghaut, hat eahm in de Hand bissn, hat eahm zwa Glasaugn gspuckt und hat se von den Herrn die Waffe nicht entwinden lassn. Ja, das wird amal a Polizist, Herr Rat! Jetzt klagt mi der Herr auf körperliche Schmerzensgelder. Hätt er mi ausredn lassn, dann hätt er net acht Tag lang in Kranknstand müassn. Dann wär alles guat ausgangen.“
Der Kläger („ A schene Famülie! Der Bua wollt mi mit , Hände hoch!’ zwinga, dass i eahm mei Feuerzeug gib!“) verzichtete auf Schadenersatz. Der Akt wurde abgelegt.