Im Toten Gebirge

I hab unlängst an Ausflug durchs Tote Gebirge gmacht", berichtete Herr R. dem Bezirksrichter. „ A tote Gegend, unhamlich ruhig, man kummt se durt vur wia in an Grab, so totenstill is im Toten Gebirge.

Trotzdem hab i ma, wias zwöfle wurdn is, mein Radio aufdraht, weil i ma immer de Nachrichten zu Mittag anhör. I bin ganz allan auf an Stan gsessn, in der toten Saison sehn S ja niemanden im Toten Gebirge, und auf amal fallt ma mei Radio um, rutscht über de Staner und fallt in a Gletscherspalte.

I wollt eahm wieder außeholn, es war unmöglich. Die Spalte verengt sich trichterförmig, macht an Knick, und in den Knick liegt er drinnan.

Des war vur vierzehn Tag, Herr Rat. Seitdem spült mei Radio Tag und Nacht im Toten Gebirge. De Trichterspalte wirkt wia a Verstärker, des Ganze liegt no dazua in an Echogebiet, und in der Näh hat a Wirt a neichs Hotel baut, des heißt , Zur stillen Klause. Was de scho alles probiert habn.

De Feuerwehr hat mitn Wasser einegspritzt, Staner habns eineghaut, a Erdn habns eineglaart, es nutzt nix. Zu den Knick kummans net zuwe. Und mei Radio spült immer weiter und macht nie a Pause. Es hat ganz neiche Batterien drin- nan, sehr starke, de spüln a Jahr.

Ich hab scho an an ORF geschrieben und hab ersucht, dass de Welln geändert wird. De habn ma net amal a Antwurt gschickt. De glaubn wahrscheinlich, i mach ma an bleden Spaß. Aber i habs ja nur guat gmant mit der Umgebung, weil vielleicht lauft des unter Lärmbelästigung oder unter auditive Umweltverschmutzung. I hab ma da scho so meine Gedanken gmacht, bin ja a aufmerksamer Bürger.

Jetzt klagt mi der Wirt auf akustische Umweltverschmutzung. Können Sie, Herr Richter, net a Wörterl mitn Generalintendanten Wrabetz redn?

Er soll wenigstens so liab sein und, solang mei Radio spült, nur Jodler und ländliche Weisen senden. Oder is des zu vü verlangt? I mans wirklich nur gut, Herr Rat. Fragn S meine Haberer. I bin a herzensguter Mensch, des wissn meine Leut.“

Die Klage wurde zurückgezogen. Das Gerät ist inzwischen verstummt.