Malheur statt Amour
Alsdann,
de Gschicht war a so“, berichtete der 25- jährige P eter N. dem Bezirksrichter. „ I geh neilich gschnäuzt und kamplt, mit aner mit vü Haargel fixierten Frisur, mit aner dunkelblauen Schaln und mit glänzende Lackbock zu an Rendezvous, wobei i no in der Hand an Strauß dunkelrote Rosen tragn hab, und stell mi bei mein Rendezvousplatzerl zu aner Auslag, um dort auf meine Angebetete zu warten.
Und wia i so steh und in freudiger Erwartung a Zigrettn rauch, bemerk i, dass i a Aschn am Ärmel hab. I wollts wegblasn, ma is ja als freudiger Erwartungsraucher a bisserl nervös, da kann an leicht a Aschn aufn Ärml falln, hab aber bemerkt, dass de Aschn immer mehr wird und se auf meiner gesamten Oberfläche in rasanter Weise ausbreitet. Nachdem ein freudiger Erwartungsraucher niemals so vül Aschn produziern kann, aa wann er haaß raucht und in Tschik martert, hab i sofort gwusst, dass se da was anders ohspült, hab nach obn geblickt und hab gsehn, dass i mittn in aner Aschnwolkn steh, die sich in rasanter Schnelligkeit herabgesenkt hat.
I hab an Blick in de Auslag gwurfn und hab gsehn, dass ma aus der Spiegelscheibn a uralter grauhaariger Mensch in an aschgrauen Sträflingsgwandl, allerdings im Häfnurlauberlook mit graue Schuach, entgegenschaut, der was in seiner grauen Hand an Buschen Graurosen halt. Der Anblick war grauenvoll, mir graute vor mir selber, und mit krächzender aschenbelegter Stimme hab i mehrmals wia a Graupapagei gschrian:
, Naa, des derf net wahr sein!‘, und bin dann in des Haus einegrennt, um den Übeltäter zu stellen, der was ma de Aschn aufn Schädl glaart hat.
Nach einigen Fehlversuchen, wo mi de Leit an der Tür gfragt habn: , Was wüllst denn, Vatterl?‘, hat ma aner in drittn Stock mit an Aschntrücherl und an Schürhakn in der Hand aufgmacht und hat ma mit Rücksicht auf mein vermutetes Alter sofort an P latz auf an Stockerl im Vorzimmer angeboten. Wia i eahm erklärt hab, dass er ka Aschn ausn Fenster laarn derf, aa wanns im Frühling no so kalt is, wollt er se zerst auf Vulkane ausreden, de was bekannterweise gerne ihre Aschn ohne Vorwarnung verbreiten. I hab eahm aber bewiesen, dass a Vulkan niemals Reste einer verhazten Zeitung ausspeit, worauf er ma mit den Worten , Schleich di, grauperter Hund!‘ des Stockerl wieder weggnumma hat. Mir habn dann graft, in einer grauen Wolke, sei Frau is dazuakumma und hat mi so stark mit an P racker ghaut, dass i aussehensmäßig wieder ganz normal wurdn bin. Nur mei Unterwäsch, da können S mei Freundin fragn, de war no grau.“
Die Anzeige hatte ein anderer Hausbewohner erstattet. Das Ehepaar erhielt eine Geldstrafe.