Um ein Haar
Wann a Haar in aner Waschmuschel pickt, kamma von der Weitn glaubn, de Muschl hat an Sprung“, sagte Herr N. zum Bezirksrichter. „ Des is halt so, es gibt optische Täuschungen. Mir habn se als Kinder aus an schwarzn Papier Fleckerl ausgschnitten und habns in Lehrer aufs Klassenbüachl glegt. Der is dann kumma und hat glaubt, mir habn eahm a Tintn ausgschütt. Was uns der nachgrennt is und geärgert hat er sich. Wäu uns hat man zwar no drohn dürfn in der Schul, aber wir haben Warnungen eh immer ignoriert. Heutzutag dürfns kan mehr drohn in der Schul, weil de Kinder sind weiche Geschöpfe, des macht der Kunstdünger. Bitte, das nebenbei, de Sache mitn Haar in der Muschl war kein Kindergspül, hurchn S zua, wia de Gschicht war:
I war unlängst mit aner Bekannten in an Hotel. In aner Bruchbude, zu Ihnen kann i ja ehrlich sein, Herr Richter. Aber wissn S, de habn heraußtn so vül Fahndln hänga, amerikanische, englische, und alle meglichen Farbn. Da muass ma se net scheniern beim Einegeh, weil de Leit glaubn, ma is a Tourist.
Na, wia ma wieder furtgengan, läut untn beim Portier des Telefon; halt er mi auf und sagt: , Moment! Des Stubenmadl ruaft grad an, de Waschmuschl, wo se warn, hat an Sprung.‘ Sag i: , Was geht des mi an?‘ Sagt er: , De Muschl hat vur Ihna kan Sprung ghabt, de Muschl müassn S zahlen.‘
Sag i: , I zahl ka Waschmuschl, habs ja net benützt.‘
Mant er: , Traurig gnua. Jednfalls is de Muschl hin, und i kriag 140 Euro.‘
, Ja‘, sag i, , aber net von mir. Weil wir haben nichts ruiniert.‘ – , Wie Sie glaubn‘, hat er gsagt. , I hab ja Ihnere Personalien aufn Möldezettel. Schick i Ihna halt de Rechnung ham.‘
Mit dieser Bemerkung hat er mi natürlich verärgert. Wäu wann de Post kummt, bin i nie daham, da machts mei Frau auf. Dementsprechend war i mit an Sprung hinter der Budl und hab gsagt: , Mich wolln Sie erpressen?‘
Es is aber in dem Moment des Stubnmadl kumma und hat gsagt: , De Muschl hat gar kan Sprung. Es war nur a Haar.‘ Um a Haar warma rafert wurdn, das muss ich sagn.“
Der Portier zog seine Klage zurück.