Fußmassage
Alsdann, de Gschicht war a so“, berichtete Herr Z. dem Bezirksrichter. „ I geh neilich in der Nacht von an Kaffeehaus ham, siech i, es kummt ma der Herr Pschisterer entgegn, mit dem i wegn aner Wohnungsangelegenheit seit längerer Zeit verfeindet bin.
Der Pschisterer hat an Rausch ghabt, und wann der Pschisterer an Rausch hat, kanns sein, dass er an Menschn wia mir, mit dem er seit längerer Zeit wegn aner Wohnungsangelegenheit verfeindet ist, ane schmiert.
Aus dem Grund, damit mi der Pschisterer net siecht, hab i a halbe Kehrtwendung nach rechts in a Kaufhauspassage gmacht, wo ein Fußmassageapparat steht. Auf den Apparat hab i mi draufgstellt und hab ma de Füaß massiern lassn, nur damit i in Pschisterer net begegna muass. Leider hat aber der Pschisterer direkt vur der Kaufhauspassage auf sein Nachtautobus gwart, wodurch i gezwungen war, de Fußmassage mit einem weiteren Euro fortzusetzen.
Mir wars des erste Mal scho a bissl zvül, weil der Apparat vül zu stark eingstellt is und den ganzen Körper zum Erbebn bringt. Mir san schon beim erstn Massiern de Zähnd locker wurdn, und in meiner Hosntaschn hat des Klangeld klimpert wie in an Klinglbeidl, ein tückisches Zeichen, dass i no mehrere Euro zur Fußmassage drinnsteckn ghabt hab.
Der Autobus is net kumma, der Pschisterer is vur der Passage gstandn und i hab mi massiern lassn, dass i glaubt hab, mi beidlts ausn Gwand. Mei automatische Armbanduhr hat se auf Jahre vuraus aufzogn, und mei Ehering, den i seit meiner sülbernen Hochzeit nimmer vom Finger bracht hab, hat se obebeidlt wia a Hulahularafn, und is, was i scho immer wolln hab, direkt in mein Westntaschl gelandet. Meine Kniastrümpf, de was i gummimäßig immer oberhalb der Wadln tragn hab, samma zu de Knöchln obegrutscht und habn mi fußmäßig in an Erstkommunikantn verwandlt, der was von de Eltern Strümpf um drei Nummern zu groß gschenkt kriagt, weil er ja einewachst.
Der Pschisterer hätt mi trotz allem net bemerkt, wann net in meiner Brusttaschen a Medizinflascherl mit der Aufschrift , Vorsicht, nicht schütteln!‘ explodiert war. De Medizin hat durch des Rütteln zum Schäumen angfangt, und es is der anziche Schüttelreim, den was i durch den Rüttelschaum dem Hochn Gericht anbietn kann.“
Pschisterer, der seinen Widersacher nur an den Haaren geschüttelt hatte, wurde freigesprochen.