Ein Trinkerleben
Ich kenn an, des is a Säufer“, berichtete Herr K. dem Bezirksrichter. „ Der Mann trinkt scho in der Fruah an halbn Liter Rum mit Tee und isst dazua einige Spezialpunschkrapferln, wo a sehr a starker Punsch drinnan is. Obwohl er kane Locken hat, liegt sei Haar immer in Wellen, weil er zittert so stark, dass er se mitn Kampl gar ka grade Frisur machn kann.
In seiner Wohnung hängen lauter alkoholische Sinnsprüche wia zum Beispiel , Im Himmel gibts kein Bier, drum trinken wir es hier’ und , Schnaps, das war sein letztes Wort, dann trugen ihn die Englein fort’ und , Ist der Wein in der Kanne, ist der Verstand im Manne und so furt, de ganze Wohnung is voll damit, sogar sei Türguckerl is a Spundloch von an Bierfassl’.
Der Mann hat mehrere Käfige mit weißen Mäusen daham, damit eahm kaner nachsagn kann, er siechts nur im Delirium tremens; er war scho mehrmals in Kalksburg, aber durt nehmans eahm nimmer, weil er zwei Ärzte zum Trinken verleitet und a Fürsorgerin geschwängert hat. Er is ein gottloser Geselle, der bei de Evangelischen zur Kommunion geht, nur damit er zu an Schluck Wein kummt, und er hat immer zwa Paar Autoschlüsseln in der Taschn, damit er denan Polizisten a Paar gebn kann und dann trotzdem hamfahrn kann. I hab den Menschen scho lang auf der Listn, i bin kaner, der was an andern Prügl vur de Füaß haut, aber so anTrunksüchtigen muss ma ausn Verkehr ziagn, der Mann war ja no nia nüachtern am Volant. A paarmal hat er sogar scho de Anzeige am Polizeiamt gmacht, dass eahm des Auto gstohln habn, in Wirklichkeit is er aber in sein Rausch bei der hintern Tür eingstiegn. Neilich hab i eahm wieder aus an Wirtshaus außekumma gsehn, wankend, mit rote Augn, a Zeitung in der linken Hand und seine Autoreserveschlüsseln in der rechtn. Polizist war kaner da, ders eahm weggnumma hätt, hat er glei damit sei Auto aufgsperrt und hat gstart. Da hab i aber a Funkstraf aufghaltn.
, Verhindern Sie ein Unglück’, hab i gsagt. , Nehman S dem Mann de Schlüssln weg und nahn S eahm ein! Er hat zwa Paar im Sack.’
Drauf san de hin und habn eahm außegholt, aus sein Auto, und mi zu eahm. , Was wollen Sie von dem Mann?’, habns mi gfragt, , der Herr is vollkommen nüchtern!’
War ers tatsächlich, sogar de Haar hat er glatt frisiert ghabt. Jetzt bin i der Blede, der Petschierte; Wia kann denn i wissn, dass mit dem Menschen ein Lourdes- Wunder passiert is.“
Der ehemalige Trinker („ Seitdem i durchs Trinken alle Freunde verloren habe, trink i kan Tropfen mehr.“) zog seine Klage gegen Herrn K. wegen Ehrabschneidung wieder zurück.