Hochexplosiv
Ich hab an Schrebergarten“, berichtete Herr F. dem Bezirksrichter. „ Unlängst heb i durt mit mein Schwagern a Senkgruabn aus, stoß ma in zwa MeterTiefe auf an Metallkörper. Mir grabn vursichtig weida, zeigt sich a spitze Spitze, zehn Zentimeter dick, mit no aner Spitze, und an Schraufn drauf.
, Was isn de?‘, hab i zu mein Schwager gsagt. , Is des a Kanäuröhrl?‘
, Waßt, was des is?‘, hat mei Schwager gsagt und hat sei Schaufl ganz langsam niederglegt. , Des is a Bombn! A Blindgänger ausn Zweitn Wöltkriag. Wann der explodiert, brauch ma nimmer weidagrabn. Da hast binnen Sekunden a zehn Meter tiafe Sickergruabn. Und kane Nachbarn mehr.‘
, Bledl net‘, hab i gsagt. , Bei den vielen Unglücken, die weltweit mit solche Bomben passiern. Immer wieder kommen sogar Spezialisten dabei ums Leben. Also, halt lieber den Mund und fang zum Über- legen an. Wann des a Blindgänger is, müass ma in Entminungsdienst verständigen.‘
, Waßt eh, was dann is‘, hat mei Schwager gsagt. , De evakuiern de ganze Siedlung, und murgn erfahrt de Baupolizei, dass mir a da schwarz a Senkgruabn aushebn.‘
, I kann do net a Leben lang auf aner Luftminen wohnan!‘, hab i gsagt. , I kann do net über dera Bombn mei tägliche Notdurft verrichten! Irgendwas muass gschehn, bevur was gschiecht!‘
, Hol de Blitzzangen‘, hat mei Schwager gsagt. , Mir werdn den Zünder selber obeschraufn. Der Entminungsdienst macht aa nix anders. Da setz i mit der Zangen an, du klopfst ganz leicht mitn Hammer drauf. Vursichtig, sunst regnts uns flankerlweis vom Himmel obe, und de Bombentrümmer kumman uns nach, wia a paar Skylabreste, de was se verflogn habn.‘
I hab ma Fülzpotschn anzogn, wegen der Bodenerschütterung, und gfüatterte Handschuach, und dann hamma an den eisernen Spitzl zum Schraufn und zum Klopfn angfangt. Zwamal hats knistert, da samma in Deckung ganga, und amal is sogar der Rauch aufgstiegn, aber es war nur a Tschik von mein Schwagern. Wia ma de Spitzn scho fast heruntn ghabt habn, hat uns a Nachbar übernasert. Er hat sofort zum Renna angfangt, ma hat von eahm nur a Staubwolkn gsehn, de hat se von sein Garten bis zum Polizeiamt zahrt.“
Es war kein Blindgänger, sondern eine alte Sauerstoffflasche. Ein schwerer Streit, der zwischen den Gärtnern entflammt war, wurde vom Richter beigelegt.