Wie gewonnen, so zerronnen

Vor dem Bürohaus eines Waschmittelkonzerns. Herr Julius R. wendet sich mit einer Frage an den Portier: „ I hab da bei euch in an Preisausschreiben a Flugreise für zwa Personen nach Spanien gwunna. Vierzehn Tag Vollpension für zwa Leut san aa dabei. Jetzt mecht i bittn, ob i net de Hälfte in Bargeld habn könnt. I bin nämlich a alleinstehender Mensch.“

Der Portier: „ Na und? So groß san de Portionen da untn net. Essn S halt für zwa.“

Herr R.: „ Meine Ernährungsprobleme lassn S, bitte, beiseite. Sagn S ma den Herrn, zu dem i gehn muass, und unser Gespräch hier ist beendet.“

Portier: „ Mir habn kan Herren für Einzelwünsche. Bei uns gibts kan Preisrätslonkl. Hätten S net mitgspült, wann S jetzt net wissn, mit wem S nach Spanien fliagn solln!“

Herr R.: „ Was schlagn S denn mit mir für an Ton an! Se kumman Ihna anscheinend vur wia a Riese! In meine Augn san S a Zwergerl, sovül Gold können S auf Ihnern Kappl gar net drauf habn! Nennen Sie mir Ihre Beschwerdestelle!“

Portier: „ Für Beschwerden bin i zuaständich! Und wann S Ihna über mi beschwern wolln, dann können S Ihna nur bei mir über mi beschwern! Und wann S mi no amal Zwergerl nennen, mach i von mein Hausrecht Gebrauch und zerdruck Ihna wia a laars Persülpackl!“

Herr R., kampflustig: „ De was Se zerdruckt habn, san no alle ganz! Gebn S de Hand von mir weg! Sunst zerbresl i Ihna auf a Einweichmittl und mach Ihna an Knopf in Hals, dass megaperlweiß werdn! Lassn S mi sofort vurbei, i geh jetzt zu eichern Chef!“

Herr R., vor Gericht: „ Vor Wut auf den Portier is mir der Schaum vurn Mund gstanden, aber i hab eahm nur scharf angschaut, und da war er sofort schaumgebremst und hat mi vurbeilassn. Der Herr Generäudirekta hat ma de Flugreise sofort auf a Einzelarrangement in der Hohen Tatra umtauscht. Is ma eh liaber, weil durt redns wenichstens Deitsch.

Den Portier hab i nur klagt, weil er mir beim Furtgehn das Wurt , Schmutznigl’ nachgruafn hat. Aus dem Mund eines Waschmittelportiers is so ein Wort die greßte Beleidigung!“

Der Portier war nicht erschienen. Die Verhandlung wurde vertagt.