Pack die Badehose ein!
Alsdann, de Gschicht war a so“, berichtete Herr Edmund Hai dem Bezirksrichter. „ I lieg Mitte August an an Schotterteich, wo des Nacktbaden no streng verbotn is, hab mei Badehosn nebn mir auf an Gebüsch zum Trickern aufghängt und plauder mit an Nackertn. Bitte, i war aa nackert, aber der Nackerte, mit dem i plaudert hab, war von Haus aus nackert, der hat nämlich gar ka Badehosn mitghabt. Na, und wia ma so redn, der Nackerte und i, sagt er auf amal: , Gehn S, leichn S ma Ihna Badehosn, i mecht ma a Flaschl Bier holn.‘
Sag i zu eahm: , I leich Ihnas scho, aber warum ziagn S denn net Ihna eigens Gwand an?‘
Mant er: , Des liegt ma im Augenblick zu weit weg‘, greift nach meiner Badehosn und ziagt ses an. Den Moment hab i scho a Unruhe am Strand bemerkt. Es war nämlich a gemischtes Publikum anwesend. Teilweise ganz Nackerte, dann teilweise Nackerte, und Angezogene, des warn de Angler. De Angler san ruhig bliebn, de teilweis Nackertn, hauptsächlich Damen, habn se in Oberteil umbundn, und de ganz Nackertn habn se ins Wasser geflüchtet. Es hat se nämlich in Schwarmlinie de Polizei genähert und hintn nach in an VW- Bus a Schnellrichter. Jetzt hab i gwusst, warum se der Herr mei Badehosn ausgliechn hat, und nachdem i mei Gwand selber im Auto ghabt hab, bin i eahm nach.
Er wollt ma ins Wasser entkommen, aber wia er gsehn hat, durt is er Zweiter, i schwimm nämlich wia a Fisch, zu mir sagns der weiße Hai, weil i ka Farb hab, is er wieder auße und hat se banhart der Polizei gstellt. Durt hat er behauptet, er is Amerikaner und haßt Terry Lane, sei Name steht in der Badehosn; aber i hab a Tascherl in der Badehosn, und da hab i zum Glück de Telefonnummer von aner Bekannten drinn ghabt. De Polizei hat von Bus aus sofort mit der Dame telefoniert, und die hat eine ganz genaue Personenbeschreibung von mir durchgegeben, die was von Kopf bis Fuß gestimmt hat, wodurch der andere erledigt war. Der andere kann se nämlich weder im Schwimmen noch sonst in irgendeiner Beziehung mit mir messen.“
Der andere wurde wegen Irreführung der Behörde zu einer Geldstrafe verurteilt.