Ringel, Ringel, Reihe

Bezirksrichter

zum Zeugen: „ Sie sind auf einem Rummelplatz vier Stunden lang kostenlos auf einem Ringelspiel gefahren. Da werden Sie aber von den Kindern beneidet worden sein!“

Zeuge: „ Um zwa in der Fruah is ka Kind mehr auf an Rummelplatz. Da ist überhaupt niemand mehr durt. I wär ja aa net durt gwesn, wann mi net der Jerschabek hingführt hätt.

Der Jerschabek und i warn in der Ortschaft auf Urlaub. Auf d Nacht samma meistens no a bisserl furtganga. Vül furtgeh habns durt net könna, weil es hat nur zwa Wirtshäuser gebn. Er hat mi meistens in des ane Wirtshaus eingladn und i eahm in des andere. Dadurch hamma a bisserl a Abwechslung ghabt.

Leider trinkt der Jerschabek sehr vül. I hab des vurher net gwusst. Anscheinend trinkt er daham heimlich, im Urlaub hat er se gehn lassn. Dadurch hat er mi aa auf dem Kirtag so schrecklich einedraht.

Mir gengan um zwa in der Fruah über den einsamen Rummelplatz, es is deshalb so spät wurdn, weil der Jerschabek vurher fensterln geh wollt, zu aner deutschn Urlauberin, sie hat eahm aber net einelassn, sag i spaßhalber zu eahm: , Mein Gott, wo san de Zeitn, wo i des letzte Mal auf dem Ringlspül gfahrn bin!‘

Sagt er: , Setz di auffe, damits d wieder waßt, wia des is!‘

I setz mi auffe, des war so a Ringlspül mit runde Sitz, de was auf Kettn hängan, i bin gsessn wia in an Scherm. I mach mei Ketterl zua, schau fröhlich in die Runde, auf amal hör i, dass de Orgel zum Spüln anfangt. Da hat se des Ringlspül in Bewegung gsetzt.

Der Jerschabek hat auffeglacht und gsagt: , Na, wia fühlst di denn? Gewusst wie! Rennt scho wia geschmiert!‘

, Brav‘, hab i gsagt. , Stell wieder oh.‘

Den Moment is bei der deutschn Urlauberin des Fenster liacht wurdn. , Halt!‘, hat der Jerschabek gsagt. , Des is a Zeichen! Da muass i gschwind hin! I lass die derweil fahrn, damit dir net langweilig wird.‘

Dann war er scho weg in der Finstern. I muass dazua sagn, dass de Urlauberin zwa Kilometer weit auf an Berg gwohnt hat und der Rummelplatz drei Kilometer außerhalb der Ortschaft war. Bis sechse in der Fruah bin i gfahrn, des Orchestrion hat immer gspült , Mein Herz, das ist ein Bienenhaus‘, a paar Bauern san um fünfe aufs Feld gfahrn und hamma gwunkn, obe lassn hat mi erst a Polizist. I war so schwindlig, dass i in Spiralen hamganga bin. Dreimal um de Ortschaft, dreimal ums Haus, dreimal ums Bett. Sogar unter der Tuchent hab i mi no lang umadumdraht, mitn Kopf zu de Füaß und von de Füaß zum Kopf.“

Jerschabek, vom Schausteller geklagt, muss die hohen Stromkosten bezahlen.