Prägnante Typen

Ich bin beim Kartnspieln ganz gemein betrogen wordn“, sagte der Tapezierermeister Johann W. zum Bezirksrichter. „I hab neilich a Wohnung austapeziert und bin dann nach der Arbeit in a klans Gasthaus ganga.

I wollt ma wirklich nur ein Achterl Rotwein kaufen. Leider hab i mi von einigen Kartenspielern, de durt gsessn san, auf an Schnapser von siebene obe überredn lassn.

Eigentlich gschicht ma ja recht, dass i übernumma wordn bin. Des Aussehn der drei Spieler hätt mi bedenklich stimma müassn. Ich sag Ihna, Herr Richter, de drei habn ausgschaut wia Statistn aus an Räuberfilm.

Da war aner mit aner schwarzn Bindn übern rechtn Aug. Der hot scho beim Ohhebn gschwindelt. Mitn linkn Aug hat er weggschaut, damit er mi täuscht. Aber in der Bindn hat er mitn rechtn Aug aussegschaut.

Da Zweite hat a Narbn vom rechtn Uhrwaschl bis zum linkn Mundwinkel ghabt. Er hat immer ausgschaut, wia wann er lachn tät. Aber eigentlich war des der Grimmigste. Der hat se beim Gebn de ganzn Adutn zuwegschanzt.

Der Dritte hat a Fuaßprothese ghabt. Wann eahm der mit der Augnbindn aufs Schienbein tretn hat (ein geheimes Zeichen), dann hat se des anghurcht, wia wann aner gegn a Ofnröhrn haut.

Nach vier Partien hab i so vül Geld verlurn ghabt, dass i an ganzn Gemeindebau austapeziern müasst, um den hohen Verlust wieder einezbringa.

,Meine Herrn‘, hab i gsagt. ,Gebts ma sofort des Geld zruck! Ich weiß jetzt, dass ihr geschwindelt habts! Also her damit, aber schnell.‘

Was glaubn S, Herr Richter, was ma de gebn habn? Dreimal dürfn S ratn. A paar Watschn habns ma gebn. Und von dem mit der Prothesn hab i an Tritt kriagt.

I bin sofort aufs Sicherheitsbüro ganga. Den mitn Frankensteingsicht, den Zerschnittenen hab i im Verbrecheralbum gfundn. So grimmig wia der dreinschaut, hab i eahm glei erkannt. De andern zwa müassertn doch auch zum Derwischn sei! Prägnante Typen! Keine Frage, solche sieht ma net oft.“

„Frankenstein“Josef Z. liegt derzeit mit einer offenen Wunde im Spital. Die Verhandlung wurde vertagt.