Restaurantkritik
Normalerweis bin i net so haglich, aber wenn so a Fettschwarte dran is, dann is aus bei mir. Man zahlt ja aa net wenig für so an Hauptgang in an Restaurant. Und wenn i ma scho des Menü auswärts gönne, dann möcht i aa qualitativ verwöhnt werdn“, erklärte Norbert S. vor Gericht.
„ Also, de Gschicht war a so, i bin unlängst zum Wirtn ums Eck gangen. Es is a recht a feines Lokal, also Wirt is a Untertreibung. Aber wenn i dran denk, wia er se benommen hat, dann muass i sagn, Maniern hat er kane. I setz mi auf an Vierer- Tisch, a anderer war net frei, kummt er glei her und stampert mi weg und sagt: , Gehn S, san S so freundlich, setzen Sie sich zur Theke, i brauch den Tisch in Kürze für Stammgäste.’
Na, des hört ma net gern, aber i bin ja ka unfreundlicher Mensch, deshalb hab i mi auf de, wenn auch ungemütli- chen Barhocker gsetzt. Dann wollt i was bestelln, is immer der Kellner an mir vurbeigrennt. Nach zehn Minutn hab i dann endlich an Kellner bekniet, dass er kurz mei Bestellung aufnimmt.
Dann hab i de Zeitung glesn und auf mei Suppn und den Schweinsbratn gwart. Der Bratn war a Enttäuschung. Den hab i zruckgschickt – aa des nächste Stück und des übernächste.
Dann is der Wirt daherkumma und hat mi gfragt, was ma net passt. Er hat de Augn verdraht. Sag i: , Warum verdrahn Se jetzt de Augn? Glaubn S, i lüg?’
Sagt er: , Nein, nein, aber es verwundert mich dennoch. Sie sind der erste Gast heute, der den Schweinsbraten zurückschickt. Und ich habe ihn selbst heute vor dem Mittagsgeschäft gegessen. Und ich muss sagen, er schmeckt sehr gut. Wie immer.’
Dann hat er se umdraht und war furt. Des hat mi geärgert, des geb i zua. I bin eahm nach und hab eahm angschwindelt, dass i a Restaurantkritiker bin. Da is er nervös wurdn und hat ma allerlei Speisen aufgetischt. Und darunter no an Schweinsbratn, diesmal vom Feinsten. , Warum net glei?’, hab i gsagt und das Geheimnis gelüftet, dass i eigentlich a Buchhalter bin. Is er explodiert und hat mi gschimpft. Deswegn san ma jetzt da.“
Der Angeklagte, nämlich der Wirt, wurde vor Gericht freigesprochen.