Herzenswunsch
Ich wünsch ma scho lang a Büld, wo i als a Schlafender drauf bin“, sagte Herr P. zum Bezirksrichter. „Warum, waß i net, vielleicht mecht i wissn, wia i amal als a Toter ausschau, es is jednfalls so, dass i ma schon lang so a Büld wünsch, und i wollt mi scho selber im Schlaf fotografiern, und hab ma a Stellasch aufbaut ober mein Bett mit der Kamera und mit an Blitz und mit an Selbstauslöser, der was se nach a paar Stundn selber auslöst. Aber de Sache hat net funktioniert, i bin im Bett glegn und hab net einschlafn könna und hab dauernd auf den Apparat auffegschaut und hab a Angst ghabt, dass i aufwach, wanns blitzt, und dass i dann vielleicht als a Munterer drauf bin, verschreckt vielleicht sogar und schiach, weil mi der Blitz ausn Schlaf grissn hat. Dadurch bin i nie zu an Büld kumma, wo i als a Schlafender drauf bin, obwohl das ein Herzenswunsch von mir is, ein geheimer, weil so was derzählt ma kan.
Drum war i neilich froh, wia i in an Wirtshaus mit an ins Gespräch kumma bin, der was vom Fotografiern versteht. ,I bin so müad‘, hab i um a zehne zu eahm gsagt. ,I hau mi jetzt nieder.‘ ,I no net‘, hat er gsagt. ,Vur zwölfe, ans kann i nie einschlafn.‘ ,Na, dann‘, hab i zu eahm gsagt, ,könnten S ma an Gfalln tuan. Kumman S zu mir, und fotografiern S mi als a Schlafender.‘ Er hat zerst bled gschaut, aber dann hat er gsagt, des is a Arbeit und da wüll er pro Stunde 50 Euro dafür.
I hab eahms versprochn, weil i an dem Tag eh schon hundsmüad war und für a Büld, wo is als a Schlafender drauf bin, keine Kosten scheue. Drum hab i eahm mitgnumma, an sich a Vertrauensbeweis, er hätt ma ja de Wohnung ausrama könna, derweil i schlaf, und er hat se zu mein Bett gsetzt mit an Viertl Wein und hat gwart, bis i einschlaf.
I bin aa wirklich eingschlafn nach aner Wäu, weil er hat ma Sachn aus sein Lebn derzählt, de was auf mi eine einschläfernde Wirkung erzielt ghabt habn, mit de Erlebnisse, was der ghabt hat, zahlt ses überhaupt net aus, dass ma lebt, und wia i um a ans wieder aufgwacht bin, hab i gsehn, dass er schlaft.
Am Bildzählwerk meiner Kamera hab i gsehn, dass er mi gar net fotografiert hat, und damit er kane Ansprüche stelln kann, hab i eahm als a Schlafender fotografiert. Jetzt hat der Mann a Büld, wo er als a Schlafender drauf is, i hab no allerweil kans, und er verlangt Geld von mir, weil er sagt, so a bleds Büld, wo i als Schlafender drauf bin, is überhaupt ka Problem, des hätt er im Schlaf gmacht. Ersuche um Abweisung seiner Anspruchsklage, i hab eahm dann, weil i nachn Schlaf fit war, beim Schlaffitl packt und außeghaut.
Der Prozess wurde zur Einvernahme des Amateurfotografen vertagt.