Das strahlendste Weiß
A lsdann, de Gschicht war a so“, berichtete Herr P. dem Bezirksrichter. „I steh damals, an an Samstag in der Fruah, im Badezimmer und mach mi fesch, i hab nämlich an Ausflug mit aner Bekanntn, mit der Frau Susi, vurghabt, klopfts. I mach auf, weil i glaubt hab, es is scho de Frau Susi, steht draußn a Vertreter und sagt: ,Sind Sie Träger der dritten Zähne?‘
,Ja‘, sag i. ,Warum tuan S denn so feierlich, wia wann i Träger eines hohen Ordens war. A Gebiss hab i, warum?‘
Mant er: ,Dann gestatten Sie mir, dass ich Ihnen unser neuestes Haushaltsgerät vorführe, die GEWAMA; die Gebisswaschmaschine.
Wie Sie sehn, schaut unser GEWAMA wia a normale Waschmaschin aus, nur is die GEWAMA klein und zierlich, verbraucht wenig Strom und verschafft Ihrem Beißwerkzeug binnen zwa Minuten das strahlendste Weiß Ihres Lebens. Die GEWAMA wird einfach an a Steckdosn angsteckt und funktioniert mit jedem herkömmlichen Waschmittel, immerhin 20 führende Waschmittelhersteller empfehlen bereits unsere GEWAMA. Dabei is sie so sparsam, als Messbecher genügt a klaner Fingerhuat.‘
,I hab jetzt ka Zeit‘, hab i gsagt. ,Es kummt glei die Frau Susi, und i mecht ma no an Kaffee warma.‘
,Ja, ja, geh warma‘, hat er gsagt und hat ma gschwind meine Zähnd ohbettlt. ,Die GEWAMA reinigt Ihna derweil des Klavier.‘
Na, i steh in der Kuchl, er im Bad, auf amal hör i eahm scho fluachn und mit an klan Hammerl klopfn. I bin sofort aussegrennt und hab gfragt: ,Wasch isch losch?‘
,A Defekt‘, hat er gsagt. ,De Maschin geht net auf.‘
I hab mas sofort zwischen de Knia zwickt und wollts mit aller Kraft aufdrahn.
,Da nutzt ka Gewalt‘, hat er gsagt. ,I ruaf den Kundendienst an. Hoffentlich erreich i wen an an Samstag. Wo habn S denn Ihner Telefon?‘
,I hab ka Telefon‘, hab i gsagt. ,I wüll meine Tschähnd! De Schuschi kummt! I hör scho Schdecklschuach auf der Schdiagn!‘ Mit dem Mut der Verzweiflung wollt i de Maschin mit an Fleischschlegl zsammhaun, reißt er mas aus der Hand und rennt damit furt. Drei Tage später hab i mei Gebiss von der Firma mit an Entschuldigungsschreiben per Post zruckkriagt. Wen i nimmer zruckkriag, is wahrscheinlich de Frau Susi; die is so bes auf mi, weil i s an dem Tag net in de Wohnung lassn hab.“
Der Vertreter erhielt wegen Entwendung fremden Eigentums eine hohe Geldstrafe. Frau „Schuschi“war als Zuhörerin im Gerichtssaal anwesend und verließ im Anschluss an die Verhandlung mit Herrn P. Arm in Arm das Gebäude.