Das Wunderding
Alsdann, de Gschicht war a so“, berichtete Kurt N. dem Bezirksrichter. „I sitz neilich an an Sundoch in der Fruah in mein Gartn, kummt a Vertreter zu mir und fragt mi, ob i an geräuschlosen Rasenmäher kaufn mecht.
,Den kaufert i sofort!‘, hab i gsagt. ,Da könnt i zum Beispül heut am Sundoch mein Rasn mähen, ohne dass se de Nachbarn aufregn. Aber leider gibts so was net.‘
Mant er: ,Mei Rasenmäher geht so leise, dass ma glaubn könnt, Se schneidn des Gras mitn Rasiermesser oh! Wann S wolln, können S eahm glei ausprobiern!‘
Drauf hat er aus sein Auto den Rasenmäher bracht, und a Schippl Reklamzettln und a Reklamkapperl; hab i gsehn, des is aner mit an Benzinmotor, de was normalerweise am lautesten san.
,Kann ma gar net vurstelln, dass der kan Lärm macht!‘, hab i gsagt.
,Se werdns sofort hörn‘, hat der Vertreter gsagt. ,Fahrn S damit a paar Meter, aber san S so liab, und setztn S Ihna des Reklamkapperl auf, de Nachbarn solln sehn, von welcher Firma des Wunderding is.‘
Er hat ma des Kapperl aufgsetzt, i hab de Maschin gstart, hab i wirklich nix ghört wia leises Vibrieren. Wia i gsehn hab, dass er a tulli schneidt, war er scho so guat wia kauft.
Der Mann hat ma zwanzg Prozent Werbenachlass gebn mit der Bedingung, dass i beim Schneiden immer sei Reklamekapperl trag. Wia er furt war, hab i sofort wieder zum Mahn angfangt und hab gsehn, de Nachbarn kumman aus eahnere Hüttn ausse und machn a bes Gsicht. Des is der Neid, hab i ma denkt und hab weidagarbeit. Dann hat ma scho der linke Nachbar mit der Faust deut, hat grimassierend de Lippn bewegt, wia wenn er schrein tät, und is dann mit an Sprung über mein Gadern kumma. Na, mehr hab i net braucht. Es is alles so schnell gangen, Herr Rat. Er hat ma in Windeseile des Kapperl vom Kopf grissn, und da hab i erst bemerkt, dass des Werbekapperl bis über de Uhrwaschln geht und absolut schalldicht is.“
Der Bezirksrichter glaubt nicht an die Kapperlgeschichte und vermutet einen Bosheitsakt des Nachbarn. Zur Einvernahme des Vertreters wurde die Verhandlung vertagt.