Kein Dank, nur Groll
Des war a schrecklicher Anblick!“, sagte der Zeuge Franz T. zum Bezirksrichter. „I geh damals durchn Prater, und wia i bei der Liliputbahn vurbeikumm, siech i an Mann am Bahnkörper liegen. Mitn Hals direkt auf de Schienen und an Abschiedsbriaf in der Hand. Lebenszeichen hat er kans von sich gebn. Hab i net genau gwusst, habns eahm scho übaführt oder wüll er erst beim nächsten Zug Selbstmord begehen. Auf jeden Fall hab i glei de Rettung verständigt.“
Der verhinderte Selbstmörder war vor Gericht sehr aufgeregt. „Se habn mi in was einetheatert!“, rief er dem Zeugen zu. „Se Gschaftlhuaba! Wia san Se auf de Idee kumman, dass i lebensübadrüssig bin? Seit wann fahrt denn um die Uhrzeit a Liliputbahn? An klan Rausch hab i ghabt, sunst gar nix. I war grad aufn Weg zu an Postkastl, und weils so kalt war, bin i halt aufn Weg in zwa, drei Prodawirtshäuser einegfalln. Jeds Mal auf zwa Stamperl, des hat mi dann umghaut. Aufgwacht bin i auf der Nervenklinik. Als Selbstmörder!“
„San S froh, dass i Sie von den Schienen wegtragn hab lassn“, entgegnete der Zeuge gekränkt. „Glaubn S, weil zu der Zeit ka Betrieb auf der Liliputbahn is, warn S net gefährdet? Braucht nur a Sonderzug kumma, und es is vorbei. Aber was reg i mi do überhaupt auf, mi geht ja de ganze Gschicht nix mehr an. Wegn was habn S mi denn überhaupt als Zeuge bestellt, Se Rumbuttn? Se san do angeklagt, weil S an Sanitäter von der Rettung a Tetschn gebn habn. Da war i ja gar nimmer dabei.“
„Wiaso warn S da nimmer dabei?“, sagte der Angeklagte. „Zerscht verständichn S de Rettung, und dann verzupfn S Ihna, bevur der Abtransport beendet is? I hab glaubt, Se werdn mir bestätigen könnan, dass i nur in mein Rausch renitent gwesn bin.“
„I kann auf jedn Fall bestätign, dass Se wia a Leich auf dem Gleis glegn san“, sagte der Zeuge. „Wann i gwusst hätt, dass der Briaf in Ihnara Hand ka Abschiedsbriaf is, hätt i ja gar ka Rettung alarmiert. Nächstes Mal misch i mi in so was überhaupt nimmer drein. Von mir aus kann se aner von aner Dampfwalzn überführn lassn.“
Es wurde ein Freispruch wegen Volltrunkenheit gefällt.