Richtungsweisend
Alsdann, de Gschicht war a so“, berichtete Herr B. dem Bezirksrichter. „I fahr unlängst in der Eisenbahn und hab an Fensterplatz, auf amal sagt der Herr, der was vis-àvis von mir gsessn is: ,I hätt a große Bitte an Sie: Könnten Sie mit mir Platz tauschen? I sitz nämlich gern in Fahrtrichtung.‘
,So groß is de Bitte gar net‘, hab i gsagt und hab den Herrn mein Platz überlassn. ,Mir is des nämlich vollkommen egal, wia i sitz. Es tät mi nur ans interessiern, weil i des so oft erleb: Warum sitzn eigentlich so vül Leut so gern in Fahrtrichtung?‘
,Des hat verschiedene Gründe‘, hat der Herr gsagt. ,Erstens amal tuat a Mensch sehr gern in de Zukunft blickn. Wann er in Fahrtrichtung sitzt, siecht er scho von der Weitn, was kummt; sitzt er aber verkehrt, muass er se a Ewigkeit lang de Vergangenheit anschaun. Mir fahrn jetzt zum Beispiel an sehr vül Bam vurbei. I siech immer an neichn Bam, und Se müassn Ihna de ganze Allee a Stund lang anschaun. Weiters bewegt se ja der Mensch bekanntlich vorwärts, es kummt nur seltn vor, dass Sie rückwärts gehen. Was anders is des bei bestimmte Tierartn, bei an Krebs und bei der Vogelspinne zum Beispiel. De gengan sehr gern rückwärts, diese Tiere. Wann S mit an Krebs in der Eisenbahn fahrn, is eahm am liabsten, se gebn eahm an Platz gegen die Fahrtrichtung. So, wie Sie jetzt sitzn. Das is an Krebs am liabsten. Se habn ja auch, wann i Sie genau anschau, a gewisse Ähnlichkeit mit an Krebs, wie ja alls in der Natur sich ähnelt, was sich ähnlich is. Drittens herrscht bei offenen Fenstern immer a gewisser Fahrtwind, der kühlt die Stirne und druckt an de Uhrwaschln an. Wenn Sie aber entgegn der Fahrtrichtung sitzn, kriagn S den Wind von hintn. Er zraft Ihna und druckt Ihna de Uhrwaschln vire, sodass Sie mit der Zeit wegstehende Ohrn kriagn. Und dann gibts no an ganz an klan Grund für das Sitzn in Fahrtrichtung: Wann der Zug a Notbremsung macht, fall i weich auf Sie, Se haun Ihna aber ziemlich in Schädl an. Was habn S denn? Warum packn S mi denn, warum zahrn S mi denn auf? Se wolln Ihnern Platz wiederhabn?
Geht leider net. I gib mein Platz nie auf, wann i amal in der Fahrtrichtung sitz...“
Herr B. hatte sich nach kurzem Ringkampf seinen reservierten Fahrtrichtungssitz zurückerobert. Der Bezirksrichter sprach ihn vom Vorwurf der Gewaltanwendung frei.