Ein hochintelligenter Numismatiker

Mei Schwager is Numismatiker“, sagte Herr B. zum Bezirksrichter. „Der sammelt Münzen. Wia ma mei Frau des erste Mal davon erzählt hat, hab i glaubt, er is a Bettler; da bin i aber falsch gelegen, der Mann is hochintelligent, drum kummt er so selten zu uns. Mir wurscht. Er hat alte Münzen in seiner Sammlung, teilweise aus der Zeit, wos no gar ka Geld gebn hat. De Gschicht, wegen der i heut da bin, is ma wegn so aner altn wertvollen Münzen passiert. Wia mei Frau marod war, hats mi zu mein Schwagern gschickt, er kummt ja so selten zu uns, und hat ma a wertvolle alte Münze für eahm mitgebn. Mei Schwager spült in an Nachtlokal Saxofon, er is hochintelligent, da macht er erst spät in der Nacht Schluss, so hab i vurher no zu unsern Wirtn geh könna.

Um a zwölfe, i war schon guat aufglegt, hab i des Gasthaus verlassn und bin zu mein Schwager gewandert. Unterwegs bin i bei an Kaugummiautomaten vurbeikumma und hab ma an Kaugummi kauft, damit der Schwager net gleich riacht, dass i was trunkn hab. Er is ja hochintelligent. I greif in Sack, nimm a Klangeld ausse, schmeiß eahm in den Automaten und kriag glei drauf a Kugerl ausse. Im selbn Moment durchfahrts mi wia a Blitz, i fahr in Sack und bemerk, dass des a wertvolle numismatische Münze war, die i da erwischt habe. In meiner Verzweiflung hab i mein Kopf an die kühle Scheibe des Automaten gelehnt und hab nachdenkt, wia i wieder zu der Münzen kumm.

I sags, wias is: I wollt den Automaten mit mein

Taschnfeitl von der Wand schraubn, aber es is net ganga. I wollt sogar zu dem Herrn in de Wohnung geh, neben dem sein Fenster der Automat hängt, und wollt eahm ersuchn, dass er ma von innen a paar Ziagl aussedruckn lasst, aber er war net daham.

In meiner Verzweiflung bin i dann zu aner Tankstell ganga und hab ma a Eisnsagl ausburgt. De erste Tankstell hat ma kans gebn. Bei der zweitn Tankstell hab is mit aner List versucht: I hab den Tankwart um zwanzg Liter Hazöl samt Kanister angraunzt, und wia er naa gsagt hat, hab i gsagt, er soll ma wenigstens a Eisnsagl burgn. So bin i zu an Sagl kumma und auch zu der Münze. Leider net lang.

Grad, wia i mit dem Kaugummiautomaten wia mit an rundn Aquarium hamganga bin, hat mi a Polizist ohgfangt. Bitte um Milde, mei Schwager is so a hochintelligenter Mensch, wann der von der Gschicht erfahrt, kummt er überhaupt nimmer zu uns. Des würd mei Frau sehr traurig machn!“

Die Anklage wegen boshafter Sachbeschädigung wurde fallen gelassen. Herr B. (wir haben den Namen des Schwagers geändert) muss lediglich die Wiederanbringung des Automaten bezahlen.