Milchstraße, Venus und Spiralnebel

Bezirksrichter, zu dem in Wien wohnhaften Johann N.: „Um zwei Uhr Früh führen Sie noch Debatten mit nächtlichen Passanten! Um diese Zeit schläft man besser schon!“

Johann N.: „Ja, wamma bei der Jusitz is. I bin a Binkl, a Kellner, es war im September, i kumm um ans in der Nacht ham. Dann wasch i mi no, les a Zeitung und lahn mi no ins Fenster, damit i a bissl frische Luft schnappn kann.

Damals aa. I schau beim Fenster ausse, i wohn im drittn Stock, rauch a Zigarettn, es war a sternklare Nacht, geht aner untn vurbei, schaut längere Zeit sinnend auffe und fragt mi dann, ob i waß, wo de Mülchstraßn is.

Sag i zu eahm: ,Ihr Interesse in Ehren, aber de is so weit weg, de können S nur mit an Fernglasl sehn.‘

Mant er, des gibts aber net, weil er war scho amal da und hats mit freiem Aug gsehn.

,Ja‘, sag i. ,Des täuscht. Oft glaubt ma in der Nacht, ma siecht de Mülchstraßn, in Wirklichkeit is a Altweibersummer, der vorüberzieht. Genügt Ihna net de Venus? De sehn S zum Greifn nah.‘

Schaut er auf a Prostituierte ume, de in der Näh gstandn is und sagt: ,Was interessiert denn mi der angsandelte Fixstern? I suach nur ans: Mülchstraßen und Firmament! Können S ma a Auskunft gebn oder net?‘

Sag i: ,Schrein brauchn S net um de Zeit und scho gar net mit mir. Wann S so happig auf de höheren Dinge san, gengan S obe zur Urania, vielleicht hat durt a Sternwartler Dienst, den S buseriern könnan. Mi können S net sekkiern! Weil i bin net Ihna Privatastronom, Se Kometnschani!‘

Schreit er auffe: ,Kusch, alter Kepler!‘ und nachdem i den altn Kepler, der bekanntlich ein großer Astrologe war, net von an hinichn Universum beleidigen lass, hab i no mein Tschik wia an klan glühatn Meteoriten beim Fenster obeghaut und hab zuagmacht. Jetzt haßts angeblich, dass der Herr in der Mülchgassn a gewisse Firma Mendt gsuacht hat und sei Kepler ein Synonym für Kepplzahn war. Beantrage Freispruch, in der Nacht suacht ma ka Firma, außer ma is bsoffn und hat Spiräunebl im Hirn.“

Der späte Passant, der eine Brandwunde am Scheitel erlitten hatte, zog seine Klage zurück.