Watschenmann
Beim Heurigen wars, Herr Rat“, berichtete Herr L. „I steh an der Schank, zöhl grad meine letzten Euro, ob sa se no für a Viertl ausgeht, auf amal kriag i von hintn a murdstrumm Watschn, dass ma glei des Geld aus der Hand ghaut hat. I hab mi zuerst gar net auskennt, Herr Rat. I war ja aa in Feierabendstimmung, und auf sowas war i bestimmt net gefasst.
I drah mi um, steht hinter mir a Bsoffener und sagt: ,Tschuldign, i hab Ihna verwechslt. I hab glaubt, Se san der Herr, der ma vurhin mein Wein ausgsoffn hat.‘
,Ah so‘, sag i. ,Guat, irren is menschlich. Aber gebn S ma des Geld, was ma jetzt wegn Ihna in Kanäu grollt is. Weil des is jetzt weg, und i kann bestimmt nix dafür.‘
Mant er: ,Wann is hätt, hätt i Ihna ka Watschn gebn. Da hätt i ma scho lang a neichs Viertl kauft.‘
,Was?‘, sag i, ,Se habn ka
Geld und haun auf mi her? Da habn S, Se Falott!‘, und hab eahm aa in der Folge a Watschn gebn.
Er schaut bled, sagt zu mir: ,Das habn S jetzt aber mit Absicht gmacht!‘ und haut glei wieder zruck. Ich konnte gar nicht so schnell schaun. Drauf gib i eahm de zweite Watschn, er gibt mir de dritte, und grad wia i mit an Faustbusserl auf gleichstelln wüll, sagt a Herr nebn mir: ,Da is des Geld, was Ihna obegfalln is!‘
Drauf hamma sofort den Schlagwechsel beendet und san – man glaubt es kaum – miteinander wieder in den
Heurigen eine. Grad, wia ma durt jeder a Achtl – auf meine Kostn – trinkn, kummt a Polizist
und fragt, warum ma graft habn. I sag, des is scho erledigt, mant er, für eahm net, mir müassn sofort mitkumma.
I sag guat, mei Watschnkollege sagt: ,Aber gar nix, mir bleibn da.‘ Jetzt hab i net gwusst, soll i mitgeh oder net, na und dann hat uns der Polizist auf amal aus dem Heurigen aussegschleppt.“Wegen Amtsehrenbeleidigung wurde der „Watschenkollege“zu einer Woche, Herr L. zu zwei Tagen bedingt verurteilt. „I hab a bisserl mehr kriagt“, sagte der Kollege, „weil i – es is ka Geheimnis, und i schäm mi aa dafür – scho einige Male an Polizisten des Götzzitat gschafft hab. Aber des is a andere Gschicht.“
Der Bezirksrichter schüttelte den Kopf.