Zur Geisterstunde
Eswar kurz vor Mitternacht“, begann die Hausbesorgerin Paula E. vor Gericht die Schilderung eines unheimlichen Erlebnisses. „I hab scho gschlafn, auf amal hör i de Hausglockn läutn. Des kummt ja öfters vur, aber normalerweis läut aner kurz an und wart, bis i kumm.
Dermal wars anders. De Glockn hat in aner Tour gläut, in aner Tour, dass ma scho deswegn angst und bang wordn ist. I schlupf gschwind in an Mantl eine, greif nach de Schlüssln und renn ausse. Zerst hab i durchs Schlüsselloch gschaut und hab gsehn, dass aner mitn aufgestelltn Kragn draußn steht. Er hat de Händ in de Taschn ghabt, und de Glockn hat no allerwäu gläut. Und wia i aufsperr, tritt er auf mi zua und hat a langes Messer in der Hand.
I mach an Schra und hau den Haustorflügl wieder zua. Des war mei Rettung. Draußn hats an Pumperer gmacht, wia wann a Kohlnsack umfallt, und i bin gschwind in erstn Stock zu aner Partei grennt, de was a Telefon hat. Von durt hab i dann de Polizei angruafn.“
„Herr Rat!“, sagte der 32-jährige Möbeltischler Ernst Z., der damals vor dem Haustor gestanden war. „Lassen S Ihna erklärn, wia des Ganze war. I hab damals in erstn Tag bei aner Witwe in Untermiete gwohnt und hab no kan Haustorschlüssl ghabt.
Wia i um a zwölfe hamkumm, hab i bei der Hausmasterin anläutn müassn. I druck aufs Klinglknöpferl, auf amal bleibt des Knöpferl steckn, und de Glockn hört net zum Läutn auf. Na servas, hab i ma denkt, du führst di in dem Haus ganz guat ein, und hab probiert, dass i des Knöpferl schnell wieder ausse bring. Weils mit de Finger net ganga is, hab i ma denkt: Kletzlst des Knöpferl mitn Taschnmesser ausse und machs auf.
In dem Moment sperrt de Frau des Haustor auf, macht an Schra und haut de Tür wieder zua. Weiter waß i nix mehr. I bin erst wieder im Spital aufgwacht. Der Torflügl hat mi am Schädl troffn. Da habn S a ärztliches Gutachten über den Unfall: a leichte Gehirnerschütterung, Steißbeinprellung, a blaues Aug und an Nasnbeinbruch.“
Die Verhandlung gegen Frau E., die wegen fahrlässiger Körperverletzung angeklagt ist, wurde zur Einvernahme der Polizisten vertagt.