„Das fällt mir im Traum nicht ein!“
Alsdann, de Gschicht war a so“, berichtete der Tiroler Stanislaus D. dem Bezirksrichter. „I kumm neilich von an klan Ausflug ham, wüll scho bei mir in de Wohnung einegeh, fallt ma ein, in Paus, mein Nachbarn, hast scho lang net gsehn, fragst eahm amal, wias eahm geht. Er is zwar a seltsamer Kerl, aber wir plaudern von Zeit zu Zeit. Ma wüll ja a guate Nachbarschaft pflegn, oder net?
I drah mi also zu seiner Tür, putz ma auf seiner Tackn de Füaß oh, so wia ses ghört, wamma an Besuch machn wüll und wüll scho klopfn; fallt ma ein, dass i in Paus eh erst gestern gsehn hab, und da wirkts vielleicht aufdringlich, wann i eahm scho wieder frag, wias eahm geht. Aus dem Grund bin i wieder obe von seiner Türtackn und bin zu mir eineganga, wo sonst hin, i wohn ja durt.
Na, is setz mi nieder und ziag ma de Schuach aus, und wia i no den an Schuach in der Reißn hab, bemerk i, dass ma kalt auf de Fuaßsohln ziagt. Sehr unangenehm, wia me se vurstelln kann.
De nächsten Ereignisse warn in jeder Beziehung traumhaft. I hab nämlich bemerkt, dass meine Schuachsohln total zerschnittn warn auf lauter Straferln. I bin wia im Traum aufgstandn und hab ma sofort denkt, des kann nur mein Nachbarn sei Türtackn gwest sei.
I wollt daher in meinen Hauspatschn zum Paus hatschn, und kaum war i draußt, hab i scho gsehn, wia der Paus grad a paar alte Rasierklingen
aus seiner Fuaßmatten entfernt. De hat er ma einegsteckt ghabt, damit i ma meine Schuach zerschneid! So was is ja net normal, da muass ma se ja vurkumma wia im Traum. Das fällt mir im Traum nicht ein!
I beantrag daher fürn Herrn Paus drei Wochen Traumhaft und a Paar Schuach als Schadenersatz! Kaufn S eahm de Schneid oh, Herr Richter, damit se kaner mehr bei eahm de Füaß zerschneidt! Danke im Voraus für das gerechte Urteil. Se machn Ihre Arbeit auf jedn Fall guat.“
Herr Paus („Mei Nachbar putzt se scho seit Wochen seine Gatschschuach bei meiner Tür oh! Jetzt tuat er so, als wenn er mi besuchen hat wolln. I lass mi net für dumm verkaufen!“) erhielt eine Verwarnung und muss für die kaputten Schuhe Schadenersatz leisten.