Heiteres Bezirksgericht
Leo der Große
Mi können S nachmessn“, sagte der 45-jährige Leo W. zum Bezirksrichter. „I bin genau zwa Meter groß. I bin als Riesenbaby zur Welt kumma, mei Mutter hat vül mitgmacht bei meiner Geburt; heut derzählts ma no, dass de Hebamm vur Schreck ohnmächtig wurdn is, wia i mit mein Riesnschädl das Licht der Welt erblickt hab. In ka Kinderwagl hab i passt. In der Schul hab i an eigenen Tisch nebnan Lehrer ghabt, weil ma de Bank z klan war. Beim Bundesheer hab i immer ganz vurn stehn müassn, und wamma uns eingrabn habn, hab i ma a doppelt so tiafs Loch schaufln müassn. Mit an Wurt, Herr Rat, mei Lebn war immer a Riesenproblem. A Frau fürs Lebn hab i no allerweil net gfundn. Wann so a Dame in Normalgröße nebn mir geht, schauts aus, wia wamma a Schneiztüachl ausn Sack hängert.
Beruflich kann i net klagn, i bin zwar nur Fensterputzer, aber i arbeit im Akkord und brauch nur selten a Later. Spurtlich bin i a Jass beim Basketball. I schmeiß an Balln ins Körberl wia a anderer an Knopf in Klingelbeidl.
Heut bin i eigentlich nur wegn aner Klanichkeit da; aber i muass klagn, weil so was derf net vurkumma.
I bin seit Jahren Stammgast beim selbn Wirtn. I hab durt an eigenen Sessl, damit i net gar so groß wirk. Weil d Leit stänkern an an. Und i teil nur ungern Watschn aus, weil i so selten a Gsicht triff, sondern meistens nur in Huat. Der Wirt hat a Eingangstür, de is so hoch, dass i ohne Kopfbedeckung grad durchgehn kann. Zwa, drei Zentimeter warn immer no Spülraum, i hab mi beim Eintritt nie buckn brauchn, aa net, wia de dopplsohligen Böck wieder modern wordn san.
Vuriche Wochn mach i de Tür auf, wüll eine, machts an Pletscher, und i hab a Platzwundn am Hirn. I wisch ma des Bluat von de Schuach, was siech i? I steh auf aner Türtackn, de was vurher nie da war. Sechs Zentimeter hoch, Nylonflausch. I, in mein Zurn, nimm de Türtackn, schmeiß auf d Gassn, weg wars. I habs auf a Lastauto ghaut. Jetzt wüll der Wirt a neiche. I zahl nix. Dreißg Jahr hamma uns bei eahm kane Füaß ohputzt, jetzt auf amal wird er etepetete. Wann scho, bitte, aber dann muass er mas sagn.“
Der große Leo braucht den Fußabstreifer, der sehr teuer war und die Aufschrift Willkommen trug, nicht zu ersetzen.