Frappante Ähnlichkeit
Ich hab a alts Ehepaar in mein Rayon, des schaut se unhamlich stark ähnlich“, berichtete ein Briefträger dem Bezirksrichter. „Sie san alle zwa scho weit über achtzig, haben de gleichen weißn Bubikopfhaar und faltenreiche Indianergesichter, sodass a Unterscheidung wahnsinnig schwer is und i oft net waß, wamma wer aufmacht, obs er is oder sie.
Neilich aa. I hab für eahm an eingschriebenen Briaf ghabt, läut an, macht ma aner von de zwa auf, in an alten Damenschlafrock und mit aner Zigarrn in der Hand. Nachdem i waß, dass er oft ihr Gwand tragt und sie a starke Raucherin is, war i sofort unsicher und hab gfragt: ,Sind Sie es, gnä Frau?‘
Tückischerweise sans aber alle zwa schwerhörig, wodurch i ka Antwurt kriagt hab. Vielmehr hat die betreffende Person, i waß ja bis heut net, wars sie oder er, nach dem
Briaf griffn und wollt mit mein Kuglschreiber, den was i an an Bandl an meiner Jackn hab, a Kraxn aufn Rückschein machn. Es war aber a eigenhändige Zustellung, wo nur er hat unterschreibn dürfn, drum hab i mein Kuglschreiber wieder zruckgnumma und hab eahm oder ihr ins Uhrwaschl gschrian: „Wer sind Sie, gnä Frau? Sind Sie vielleicht der Herr Gemahl?‘
Drauf is de zweite Ehehälfte auftaucht, in an langen Nachthemd, mit an Kochlöffel in der Hand, und mit an eingsaftn Gsicht. De zwa habn mi angschaut wia Brüader, de was se anlässlich des
Faschings als Schwestern verkleidet habn, und wias gsehn habn, dass i a an Einschreiber bring, habn sa se ohbusslt, wodurch dann a jeder safig im Gsicht war, und da wars ma z bled, und i wollt wieder geh. „Des is sicher des Geld, auf des ma scho so lang wartn“, hat eine von den beiden Gstaltn gsagt. Aber se habn mi an mein Kuglschreiberbandl in de Wohnung zahrt. Obwohl i im Zuge meiner Abwehrbewegungen teilweise eng Brust an Brust mit eahm oder ihr und auch für Sekunden mit mein Knia zwischn sein oder ihrm Nachthemmat war, konnt i net feststellen, von wem i verletzt wurdn bin. De zwa san so gleich, da kann ma wirklich net sagn, dass aner gleicher wia der andere is.“
Der Postbeamte, der eine Zigarrenbrandwunde erlitten hatte, zog seine Klage zurück.