Die Stimme aus der Werbung
Mit einem äußerst interessanten Rechtsfall hat sich derzeit ein Richter im Bezirksgericht zu befassen: Ein Mann behauptet, er habe durch das Zähneputzen mit Schlämmkreide seine tiefe Stimme verloren.
Bezirksrichter: „Ich dachte, das kommt nur in Grimms Märchen vor! Beim Wolf und den sieben Geißlein. Da hat der böse Wolf Kreide geschluckt, um seine Stimme zu verändern. Jedes Kind kennt des Märchen.“
Kläger mit hoher Stimme: „Naa, naa, des gibt’s wirklich. Sie hörn ja, wia i red. Wia a Obereunuch aus der Zauberflöte. Am Telefon sagns alle Fräulein zu mir, weil i so a hohe Stimm hab. Des is leider ka Gschichtl. Was soll i tuan. I kanns net ändern.
I bin beruflich erledigt. I war nämlich Werbesprecher für männlich wirkende Erzeugnisse wia Rasierer und Herrendüfte. Sie kennen mei
Stimm sicher no ausn Fernsehn, wann i de Autos und de Rasierapparate und de Unterhosn für de Herrn angsagt hab. Je tiafer de Stimm, desto größer is bei solche Sachn der Reklameerfolg. Wamma so an elektrischn Rasierer no dazua a Imponiernummera gibt, sagn ma R 200 S, verkauft er se wia de warmen Semmeln.
Für a Zahnpastawerbung hab i außer meiner tiafn Stimm aa mei Gebiss herzeign müassn. Und weil i mit der Zahnpasta mein Nikotinschleier net wegkriagt hab, hat ma mei Drogist a Schlämmkreiden empfohlen. Des war mei Untergang. Wia i nachn Zähndputzn ins Studio kumm, sagt der Werbeleiter zu mir: ,Wia redn S denn heut daher? Se habn ja auf amal a Stimm wia a Sängerknabe! Mit der Stimm können S a Werbung für Lockenwickler machn, aber net für a Schlagbuhrmaschin.‘
Seit der Zeit bin i ausn Gschäft. Total. I war nämlich außer in der Werbesprechbranche auch in an Bestattungsunternehmen tätig und hab durt mit meiner Grabesstimme den Hinterbliebenen kondoliert. Mit meiner hochn Stimm bring i a jede Witwe zum Lachn. Tuat ma lad, dass i den Drogistn vurs Gericht zahrn muass, aber der Direktor vom Kreidebergwerk, mit dem i telefoniert hab, hat ma nur a Goschn anghängt. I hab ma net anders z helfn gwusst.“
Ein Sachverständiger wird einvernommen werden.