Jeder Baum zählt
Mir hättn se ja glei denkn könna, dass in dera Gschicht a Wurm drinnan is“, sagte der Gelegenheitsarbeiter Gustav K. zum Bezirksrichter. „I steh damals mit an Spezl beim Branntweina. Kumman zwa Baraber, also Bauhelfer, um schön zu sprechen, von der Gemeinde eine, mit aner langen Holzsag. Kaufn se zwa Stamperln und sagn zu uns: ,Burschn! Könnts es mit aner Sag umgeh? Ihr schauts so tüchtig aus, ihr machts des sicher mit links.‘
Mir fragn, warum; sagt der ane: ,Mir san no ganz übernachtich von aner klanen Feier. Mir müassn aber an Bam umschneidn. Den da drübn, de alte Lindn im Beserlpark.‘
,Warum soll denn der schene Bam umgschnittn werdn?‘, ham ma gfragt.
Sagt der ane: ,Durt kummt a Skulptur hin. Von an preisgekrönten Künstler. Den Namen hab i ma net gmerkt, aber des is ja jetzt a net wichtig. A künstliche Linde aus Zement. Ewig belaubt.‘
I wollt eh net, Herr Richter. I hab des letzte Mal als Bua mit an Laubsagl garbeit. Aber mit vier doppelte Kirsch mit Rum habns uns wach gmacht. Mir habn an Hunderter kriagt und san ume.
Mir fangen zum Sageln an, trifft mi was auf de Schulter. ,Franz!‘, hab i gsagt. ,Mi hat a Vogl angschissn!‘
Mant er: ,Des war ka Vogl, des war a Stan. Was glaubst, für was uns de Zwa eahnere Plastikhelme gliechn habn!‘
I sag drauf : ,Franz! Warum schiasst ma auf uns?‘, mant er: ,De Leut aus der Umgebung
wolln anscheinend net, dass der Bam wegkummt. Tumml di, i siech bei an Fenster
scho an Gwehrlauf ausseschaun.‘
Den Moment warn mir scho von aner Volksmenge umringt. ,Roter Pülcher!‘, hat aner zu mir gsagt, obwohl i no ganz schwarz von der Arbeit war. ,Unter dera Lindn hat der Bezirksvursteher a Wahlrede ghaltn! Und jetzt wollts es umsagln! Passts auf, dass ma eich net ohsagln! Weil wir kämpfen für an jedn Bam, der uns gnumma wird. Die Natur hat Vorrang.‘
Mit Ach und Krach hamma uns zum Branntweina zruckkämpfn könna. De Lindn steht heut no, des habts nur uns zum Verdankn!“
Die beiden Amateursäger wurden freigesprochen; sie hatten sich den Rückzug „in Notwehr“mit Fußtritten erkämpft.