Ganz und gar nicht salonfähig
Alsdann, de Gschicht war a so“, berichtete Herr H. dem Bezirksrichter. „I sitz neilich in an feinen Restaurant, in an kleinen Salon, und iss a Salonbeuschl. Ma genießt ja neuerdings des Auswärtsessen no mehr, seitdem de Gastronomie uns wieder verwöhnen derf. Der Lockdown hat ja wirklich lang dauert. Kummt aner eine, a gschniegelter Bursch, a echter Salonlöwe, raucht se vur der Tür a starke Zigarettn an, ma kann sagn, an Salonbeuschlreißer, und geht glei wieder furt.
Zwa Minutn später kummt der Hotelbesitzer eine, schaut aufgeregt umadum und fragt: ,Wo is der Löwe?‘
Sag i: ,Se manen den Salonlöwen? Der war grad no da, aber jetzt is er furt.‘
Schreit er: ,Des siech i! Wo is er?‘
Sag i: ,Was waß denn i, bin i a Löwenbändiger? Bändigen Sie Ihren Wutausbruch. Ein solches Benehmen ist nicht salonfähig! Ganz und gar net.‘
Mant er: ,Der Löwe muass her! Habn S gschlafn, dass S net gsehn habn, wer eahm wegzahrt hat?‘
Sag i: ,So vül i gsehn hab, is er allan furtganga. Im Übrigen hab i nach dem Genuss des Salonbeuschels wirklich a bissl dunkt. Weil i hab a Kopfleiden, und in an Salon nick i manchmal a bissl ein. Es gibt nix Schöneres, als nach dem Essen zu ruhen. A wenn andere glaubn, es is gscheiter, tausend Schritte zu tun.‘
Schreit mi der Chef an: ,Se Kopfschüssler! Was derzähln S ma denn, dass der Löwe von allan furtganga is! Den muass aner weggschleppt habn! Wia kann denn der geh, wann er schon hin is!‘ Worauf i gsagt hab: ,Wann da aner hin is, dann sans Se, im Schädl! Weil der Salonlöwe, was grad da war, der war gsünder und munterer wia Se! Mit Ihna unterhalt i mi gar nimma! Draußt steht a Aluminiumballon mit frischem Bier, bringen S ma so a Bier, Se Choleriker!‘
In der anschließenden handgreiflich untermalten Debatte hat se herausgstellt, dass irgendwer, wahrscheinlich a Diab, a Löwenfell aus dem Salon gfladert hat. Was geht denn des mi an, i bin ka Polizist, dass i in an Salon, wo i a Salonbeuschl iss, auf an ausbanltn Löwen aufpass.“
Das Löwenfell war in die Reinigung gebracht worden. Der Chef des Hauses entschuldigte sich bei Herrn H. zutiefst.