Und weg ist der Führerschein . . .
Bezirksrichter: „ Sie haben, obwohl Sie vollkommen nüchtern waren, bei einer Polizeikontrolle Ihren Führerschein verloren? Das kann ich mir nicht vorstellen!“
Franz G., 51: „Ja, mein Erlebnis übersteigt ja auch jede Vorstellungskraft. I werd Ihna kurz derzähln, wia die Gschicht war: I fahr damals auf d Nacht durch an Heurigenort, bleib steh und kauf ma in an Gasthaus a Packl Zigaretten. Weil de Nikotinsucht hab i ma no net abgwöhnen können. Wia i wieder aussegeh, rutsch i auf irgendwas aus, komm zu Fall, verlier mein Huat, rappl mi wieder auf und geh in der Verwirrung zu an fremden Auto. Wia i dann endlich mei eigens aufsperren wüll, kummt a Herr zuwe, sichtlich mit an Rausch und sagt: ,Tuan S des net. Nehman S Ihna a Taxi. Des zahlt se net aus.’
Sag i: , Wia kumman S denn auf des? I bin total nüchtern.’
Mant er: ,Mich brauchn S net mitn Tee anschüttn. I hab Ihna zuagschaut. Ihna hats grad hingstraht, möglicherweise san S a ausseghaut wurdn, dann san S zu an andern Auto gwacklt, und wolltn S Ihna ans Steuer setzn? Ja, wolln Se Ihnern Schein verliern?’
Sag i: ,Liaber Herr, Se dürfn net von Ihna auf andere schliaßn. Lassn S mi aus, weil i bin a Abstinenzler.’
Drauf packt er mi bei der Hand, mit der i aufsperrn wollt und sagt: ,Wann Se a Abstinenzler san, bin i der Papst. I kann des net verantwurtn, dass S an niederscheibn. Sie kumman jetzt mit mir. Wann S ka Geld habn, zahl i Ihna des Taxi.’
Jetzt war i scho wüld und wollt eahm wegdränga, wird er renitent und entwindet ma meine Schlüssel. Drauf nimm i eahm bei der Huastn, den Moment kummt scho a Polizist und fordert unsere Papiere . Grad, wia i dem Herrn Inspektor meinen Führerschein überreichen wüll, sagt der Bsoffene: ,Lass schaun!’ und haut mirn aus der Hand. Der Führerschein is in a Kanäugitter mit Längschlitzn gfalln und is nimmer gfunden wurdn. So hab i mein Führerschein verlurn.
I wüll von dem Herrn nur de Kosten sunst nix, er hats ja in seiner Art guat gmant.“
Der damals Betrunkene ersetzt jetzt endlich die Kosten für einen neuen Führerschein – im Kartenformat –, versprach er vor Gericht.