Wichtiges Beweismaterial
Mei Freundin is leider verheirat“, sagte der Junggeselle Otto P. zum Bezirksrichter. „Und ihr Mann hat uns droht, dass er uns demnächst in flagranti fotografiern lassn wird. Von an verkleideten Agenten. I waß zwar net, wo Flagranti is, wahrscheinlich in Italien, aber des kann a Schmäh a von eahm sein. Er sagt, er lasst uns in Flagranti fotografiern, und dann macht ers in Österreich. Aus dem Grund bin i jetzt überall vursichtig, damit ma net fotografiert werden.
Neilich lieg i in der Nacht mit meiner Freundin im Hotel Orient, ebenerdich, hab des Fenster offn, siech i, draußt steht aner, hat a Gerät in der Hand und blitzt. I bin sofort aus mein Bett gsprunga und hab ma den Mann beim Fenster einezahrt. Wars a gewisser Herr Speckel.
,Se haben uns fotografiert!‘, hab i zu eahm gsagt.
,Na‘, hat er gsagt. ,I hab an Sturm trunkn. Und des is mei Sturmfeuerzeug. Des is so groß und hat so an starkn Stan, damit i aa a Feuer zsammkriag, wann i an Rausch hab.‘
I hab den Monsterlighter zerlegt, wars wirklich nur a Feuerzeug. Sag i: ,Hörn S, Se habn a große Taschenuhr! Da kann leicht a Fotoapparat drinn sein!‘
Mant er: ,Des is a alte Rosskopfuhr mit Springdeckel, Se Rosskopf! De hab i immer mit, wann i an Sturm trink. Weil wanns spät wird, betätig i den Springdeckel und denk ma: Trink, Speckel, du muasst hamgeh!‘
Sag i: ,Ziagn S Ihna aus! Vielleicht habn S den Fotoapparat in der Unterwäsche verborgen! Bei Ihna wölbt se was in der Hosn!‘ Drauf ziagt er se aus und sagt: ,Des is mei Haustürschlüssl. I hab a großes Feuerzeug, a große Uhr und an großn Haustorschlüssel. I wohn nämlich in an altn Turm mit an gwissn Strinker.‘
Wia i gsehn hab, der Mann is nix wia a wortspielerischer Sturmtrinker, wollt i eahm scho geh lassn. Grad, wia mei Freundin zur Sicherheit no sei Unterwäsch kontrolliert hat, is ihr Mann ins Zimmer kumma und hat glaubt, mir san zu dritt da. Er wollt se aufn Herrn Speckel stürzen, aber der hat ihn abgwehrt mit seine riesigen Pratzn. Weil beim Herrn Speckel is alles groß, er is sogar so großzügig und zieht seine Klage zurück.“
Der Ehemann war nicht erschienen, der Akt wurde abgelegt.