Herr Klein in der Kleingartensiedlung
I ch kenn an gwissn Herrn Klein, der hat an Schrebergartn“, sagte Herr N. zum Bezirksrichter. „Neilich wollt i eahm besuchen, hab aber nimmer genau gwusst, wo er sein Gartn hat.
Na, i kumm obe in de Siedlung, triff i an, sag i zu eahm: ,Könntn S ma sagn, wo der Klein sein Gartn hat?‘
Mant er: ,Klein, Klein. Is des a großer Gartn?‘
,Ja‘, sag i. ,Klein is er net.‘ Mant er: ,Mir san da a Kleingartensiedlung. Wann der Klein kan klein Gartn hat, hat er kan Kleingartn.‘
Sag i: ,Der Klein-Gartn is a Kleingartn. I war scho amal da.‘
Drauf führt er mi zu an Gartn, wo drinn a Herr gsessn is, aber net der Klein, und fragt: ,Is des der KleinGartn?‘
Sag i: ,Der Klein-Gartn könnts sein. Aber der Klein is net.‘
Mant er: ,Se glaubn, in an Klein-Gartn muass unbedingt der Klein sitzen?‘
Sag i: ,Des net. Aber was nutzt ma a Kleingartn, wann ka Klein drinn is? I hab nix von an Gartn ohne Klein, der Klein ohne Gartn war ma liaber. Wann S net wissn, wo der Klein sein Kleingartn hat, dann führn S mi net zu an Kleingartn, der was net der Klein-Gartn is.‘
Mant er: ,Des is der anziche Kleingartn, den ma habn.‘
Sag i: ,Zerst habn S gsagt, es habts da lauter Kleingärtn.‘
Schreit er: ,Ja, aber nur an Klein-Gartn! Der Kleingartn da ghört in Klein, und wann der Klein net im Gartn is, is trotzdem der Klein-Gartn!‘ Den Moment hab i gesehn, dass der Klein in an andern Kleingartn sitzt, und hab eahm gwunkn.
Drauf hat er ma deut, i soll derweil in Klein-Gartn gehn, er is in dem Kleingartn nur auf Besuch. Drauf wollt i eine in den KleinGartn, wo gar net der Klein drinn war, und bin versehentlich bei an andern Kleingartn einegangen.
Durt hab i an klein Gartenzwerg zsammtretn, und der Herr ausn Kleingartn, den was der Kleingartn ghört, hat se riesig aufgregt. Er kriagt von mir an neichn klein Gartnzwerg, aber nur an Kleingartn-Zwerg. Wann er glaubt, dass i eahm an Zwerg kauf, wias in de großn Gärtn stehn, hat er se aber gewaltig girrt!“
Herr Klein und der Kleingartenbesitzer werden einvernommen werden.