Der Fluch des Pharaos
Alsdann, de Gschicht war a so“, berichtete Herr Gustav Schackel dem Bezirksrichter. „I bin neilich auf d Nacht, scho in der Finsternis, von an Wirtn hamganga und hab in an Plastiksackl zwa Dopplliter Wein tragn. Und wia i so geh, kummt ma der Herr Rebernigg nach und sagt: ,Ah, Se gengan aa scho mit an umweltfreundlichen Plastiksackerl, des is brav von Ihna. Des Sackl verrottet, a gwöhnlichs Plastiksackl verrottet nicht. Des bleibt uns erhalten bis zum Jüngstn Tag. Am Jüngstn Tag, bei der Auferstehung, können se de Leit eahnere Knochn in de Plastiksackln einsammeln, weil gwehnliche Plastiksackln verrotten nicht. Aber Ihna Sackl, Herr Schackel, scho.‘
Sag i: ,I habs vom Wirtn kriagt, damit i ma mein Wein hamtragn kann. Wiaso verrottet des und a anders net?‘
,Des is a tolle Erfindung, und zwar beruht de Sache auf der Lichteinwirkung. So a spezielles Plastiksackl können S jahrelang in der Finstern steh habn, aber wia a Liacht dazuakummt, zerfallts. Des is an sich nix Neues. De altn Ägypter habn de chemische Zusammensetzung scho kennt und habn eahnere Mumien damit präpariert. So a Pharao is tausend Jahr ohne Zerfallserscheinungen in aner Pyramide glegn. Dann is a Forscher kumma, hat de Tür aufgmacht, und weg war er, der Pharao. Können S Ihna vurstelln, wia so a Forscher gfluacht hat, das war der Fluch der Pyramiden; de habn glaubt, se findn in König Ramses II., dann ramn ses weg, de Staner, war a Häuferl Staub durt. Statt mit an Sarg habns mitn Staubsauger kumma könna.‘ – Sag i: ,De Pyramiden wurden bei Fackelschein durchsucht. So a fahle Beleuchtung hat genügt?‘
,Natürlich‘, hat der Rebernigg gsagt. ,So a Plastiksackl braucht ka Tagesliacht, dass zerfallt. Da genügt a Fackelschein. Des is, Herr Schackel, fein. So, jetzt samma da. Guate Nacht, Herr Schackel. Schlafn S guat! I drah Ihna no gschwind des Fünfminutenliacht auf.‘
,I brauch ka Liacht, weil i eh im Parterre wohn.’ Er hats ma aber aufdraht, und dann samma de Henkln von dem Plastiksackl ohgrissn. Vier Liter Wein warn hin. De muass der Rebernigg zahln. Was draht er ma denn a Liacht auf, wann er waß, dass de Plastiksackln unter Lichteinfluss zu Staub werden.“
Der Gastwirt gibt weitere 4 l Wein her.