Einsiedler
DeZeitn, wo ma als Robinson Crusoe lebn hat könna, san vurbei“, sagte Herr G. zum Bezirksrichter. „Heut können S kan Eremiten mehr spüln, heut müassn S über alle Neuigkeiten informiert sein. Wann aner glaubt, er kann se ohkapsln, is er derschossn; Isolierung is lebenslänglich, wer kan Radio aufdraht, ka Fernsehn hat und glaubt, er kann se de Zeitung dersparn, der kann das Kreuz machn. Außer er spült beim Fernsehen in aner RealityShow mit.
I hab des aber wirklich erlebt, lassn S Ihna derzähln, wia de Gschicht war. I war jetzt längere Zeit auf einer einsamen Berghütte und hab durt wie ein Einsiedler gelebt. Es wollt ma zwar aner Gesellschaft leisten, da wär ma dann Zweisiedler gwest, aber ich hab es abgelehnt, weil ich mich nervlich total erholen wollte. I wollt wirklich abgeschirmt sein von jeglichen Einflüssen. Wollt nix hörn und nix sehn von dera Welt, de se mittlerweile vü zu schnell dreht.
I hab wochenlang ka Zeitung glesn und kan Radio ghört, von an Potschenkino ganz zu schweigen, denn für mich war nur eines wichtig: ganz zu schweigen und mit niemanden a Wörtl redn. Amal in der Wochn hat ma a taubstummer Bergfex de Lebensmitteln und a bissel an Jagerschnaps bracht, der Mann war immer nur kurz bei mir, und wann i eahm aa hätt fragn wolln, was untn los is, hätt er mirs net sagn könna. Er hat mi nur manchmal mit an bedeutungsvollen Blick angschaut, aber selbst da hab ich mich abgewendet, weil i keinerlei Einflüsse habn wollt, net amal an bedeutungsvollen Blick.
Na, und unlängst bin i wieder obeganga. Nervlich gestärkt und äußerlich neugeboren, innerlich aber a Trottl, der nimmer gwusst hat, was derweil in dera Welt vurganga is. Wia i hamkumma bin, hab i gsehn, i leb jetzt nebn aner Brandruine und kann ma ohne Lavur und Badezimmer meine Füaß badn, weil des Wasser überall no knöchltiaf gstandn is.
In meiner Verzweiflung und nervlich am Ende wollt i etwas Entspannung finden und bin am Fußballplatz gangen. I hab aber anscheinend für de Falschn gschrian und hab von a paar Fußball-Rowdys de starkn Hieb kriagt, wegn de i heut da bin. I ziag aber mei Klag wieder zruck. I kann ma nämlich kan Anwalt leistn, weil inzwischen san meine paar Aktien so gfalln, so tiaf, dass is gar nimmer find.“
Zur Einvernahme einiger Zuschauer wurde die Verhandlung vertagt.