„Ich bin mit ihm Schlitten gefahren“
Ein Gespräch vor dem harten Lockdown in einem Sportgeschäft: „Herr Chef! Glaubn S, hamma an Schnee zu Weihnachtn?“
„Des is schwer zu sagen. Wanns schneibt, hamma an. Wanns net schneibt, hamma kan.“
„So gescheit bin i aa. Aber es war halt wichtig zu wissen, wengan Geschenk für mein Buam. Wann ma an Schnee habn, kauf i eahm a Rodl. Wamma kan habn, kauf i eahm a Pingpongspül.“
„Kaufn S die Rodel. Irgendwann kommt no mehr Schnee.“
„Irgendwann nutzt ma nix. Der Bua kummt nachn neichn Jahr sofort ins Internat. Da muass er stuckn. Da nutzt eahm ka Schnee und ka Rodl nimma.“
„Dann nehmen S das Tischtennisspiel.“
„Glaubn S, der spült Pingpong, wann draußt der Schnee liegt? D frische Luft is wichtig, überhaupt, wann er dann im Internat stuckn muass.“
„Na, dann kaufn S beides.“
„Da müasst i aber an Geldesel habn. Was glaubn S, was ma der Bua kost, wann er im Internat stuckn tuat. Entweder de Rodl oder des Ballerlgspül. Mir habn als Kinder selber gmachte Sachn kriagt und warn aa zfriedn. I erinner mi no guat, wia unser Vater meiner Schwester aus aner altn Kistn a Kinderwagerl gmacht hat, gstrittn hamma se drum.“
Ein zweiter Kunde, der bereits ungeduldig wartet: „Halten S da kane Vurträge. Sehn S net, was da für Leit wartn?“
„Na, na vielleicht halt! I werd do um mei Geld no a Auswahl treffn dürfn!“
„Kaufn S endlich was, und derzähln S kane Kindheitsgschichten!“
„Gehn S, sans stad, sunst derzähl i Ihna was! Mi wolln S antreibn? Da müassn S no amal auf d Welt kumma! Ich wähle mit Bedacht, verstengan S! Ich kaufe nur sinnvolle Gaben! Ohne Schnee gibts ka Rodl, und beim Schnee wird net pingapongat! Weil wann der Bua amal im Internat
is, muass er stuckn, vurher braucht er frische Luft.“
„Mittn unterm Redn hat er ma an Rempler gebn“, berichtetet der Vater des Internatsbuben. „Mehr hat er net braucht. I bin glei mit eahm, ohne Rodl, durchs ganze Gschäft Schlittngfahrn. Mit dem hat er net grechnet, des Nullerl.“
Es wurde ein Freispruch gefällt. „Mei Anwalt hats gewusst“, erklärte der Freigesprochene. „Mei Bua wird ja aa a Advokat. Jetzt muass er natürlich im Internat dementsprechend stuckn. I hab eahm z Weihnachtn an Anzug kauft. Das ist wirklich ein sinnvolles Geschenk. Des kann er tragn, obs schneibt oder net.“