Zwei Nachtwandler
Der 40-jährige Schlafwandler Ernst B. wurde kürzlich um drei Uhr in der Früh auf dem Dach seines Wohnhauses von einem Nachbarn zur Rede gestellt. „Aufwachn!“, rief Herr K. dem Schlafwandler zu und schüttelte ihn an der Schulter. „Wachn S auf! Grad hab i Ihna wieder über mei Balkonglander kraxln gsehn! Se reißn ma no mei Glander oh! So geht des net weida! Glaubn S, i bin Ihna Schani, dass i Ihna jede Nacht vom Dach obehol?“
„Wo bin i denn?“, erwiderte Herr B. schlaftrunken. „Scho wieder auf dera Zinshausschaluppn? I wollt doch heut a bequeme Flachdachpromenad übern Supermarkt machn, weils von durtn so warm aussekummt. Nur guat, dass i mi mitn Wintermantl und mit de Fülzstiefln niederglegt hab, sunst hätt i schon kalte Füaß. I dank Ihna, dass S mi holn kumman, ohne Ihna verrennert i mi no und kummert erst bei Tagesanbruch, wann ka anständiger Nachtwandler mehr unterwegs is, als a hundsmüader ham!“
„So geht des net weida!“, wiederholte Herr K. „Se san klass, und Se gengan über jedn First, Se san in dera Beziehung first class, aber des is ka Leben. Für was zahln S denn an Zins, wann S dauernd am Dach san? Se müassn was gegn de Krankheit unternehma! Trinkn S am Abend a paar Glasln Wein, dann schlafn S vielleicht durch!“
„Hab i scho probiert“, jammerte der Schlafwandler. „Des bringt nix. Wann i mit an Rausch geh, fang i zum Singa an; amal hab i sogar mit an Luftballon schlafgwandlt, da habn de Leit untn glaubt, i kumm vom Heirichn und mach an Ohschneider über de Häuser. Wolln S, dass mi de Funkstraf obeholt, wia an Lebensmüadn vom Nordturm vom Stephansdom?“
„Dann nehman S Ihna a Frau“, sagte Herr K. „Mit aner jungen feurigen Gefährtin werdn S Ihna des tramhapperte Umadumhatschn bald ohgwehna, weil wann S da aufsteh wolln, zahrts Ihna ins Bett zruck. San S gscheit, und nehman S Ihna a Frau!“
„Er hat mein Rat befolgt“, sagte Herr K. zum Richter. „Aber er hat se ane gnumma, de was er bei sein Doktor kenna glernt hat. De Frau is aa Schlafwandlerin, und jetzt gengans zu zweit. Neilich wollt sie se wegn der Kältn am Dach obn in Hintern aufwarma und hat se auf mein Rauchfang gsetzt. Dadurch hat mei Ofn kan Abzug ghabt, und i wär fast als Geist auf de Wolkn spaziernganga.“
Herr K. zog seine Klage wegen Rauchgasvergiftung gegen das inzwischen geheilte Pärchen wieder zurück.