Klein- und Großgedrucktes
Unlängst war a Vertreter bei mir und hat ma a Heizdecke angeboten“, sagte Herr E. zum Bezirksrichter. „I hab eahm einelassn, hab mirn anghurcht und hab dann gsagt: ,Liaber Herr! Jetzt zagn S ma amal Ihnere Auftragsscheine. Weil i mecht nämlich sehn, was da für a Kleingedrucktes draufsteht. I kenn nämlich a paar Leit, de was sauber draufzahlt habn, nur weils des Kleingedruckte net glesn habn.‘
,Unser Kleingedrucktes is aber sehr klan‘, hat der Vertreter gsagt und hat ma de Hinterseitn von sein Bestellschein zagt. ,I glaub, des werdn S mit freiem Aug gar net lesn könna.‘
,Ja, dann nimm i ma eben a Lupn‘, hab i gsagt und hab ma a Lupn gnumma. ,Für was gibts denn a Lupn, wamma des Kleingedruckte net damit lesn könnt. Setzn S Ihna nieder, i setz mi aa nieder, und i les amal in Ruhe des Kleingedruckte.‘
Wia i dann des Kleingedruckte glesn hab, war i angenehm überrascht. Da san nur guate Sachn drin gstandn. Da is gstandn, dass ma de Heizdeckn anstandslos zruckgebn kann, falls der Käufer in tropische Gebiete, zum Beispül nach Kenia, auswandert, weil er vielleicht durt an Schrebergarten geerbt hat und in der heißen Zone ka Heizdeckn mehr braucht. Weiters wurde empfohlen, falls der Käufer ein unruhiger Schläfer is, dass er se ein entsprechend langes Zusatzkabel anschafft, des was er se dann um den Körper wickln kann, wann er se im Schlaf umdraht. Lauter so brauchbare Ratschläge warn im Kleingedruckten, und i war auf das Angenehmste enttäuscht.
,Bei so aner Firma kauf i gern‘, hab i gsagt, hab de Heizdeckn glei auszahlt, habs übernumma und bin erst, wia der Vertreter scho furt war, draufkumma, dass i übernumma wurdn bin. I hab nämlich erst dann des Großgedruckte auf der Vurderseitn glesn, des was ja meistens net gefährlich is, und da is gstandn: ACHTUNG! VOR INBETRIEBNAHME E-WERK VERSTÄNDIGEN, DA KURZSCHLUSSGEFAHR! SOBALD IHR LICHT ERLISCHT, ERLISCHT AUCH JEDE GARANTIE! ANSTECKEN INNERHALB ÖSTERREICHS ZWECKLOS, DA NUR FÜR 110 VOLT GEEIGNET! Möcht noch erwähnen, dass i de Deckn ganz bequem zhaus kauft hab. Wann i heut siebenhundert Kilometer von der Heimat entfernt in für mi fremden Gefilden um mei Recht rafn muass, so nur deshalb, weil in aner Eckn no groß GERICHTSSTAND VORARLBERG gstandn is.“
Der Vertreter der Firma war nicht erschienen. Der Vorarlberger Bezirksrichter setzte einen neuen Termin fest. „Und wer zahlt ma den Benzin?“, so Herr E. verärgert. „Jetzt muass i no amal in Westen fahren.“