Ein Wachhund sondergleichen

Zwei Männer trafen auf der Straße zusammen. „Herr K.“, sagte der eine, „Se wünschn Ihna doch scho lang an schenan Wolfshund! Mir is gestern aner zuagrennt. A Prachtstickl von an Hund! Hundertprozentich reinrassich, folgt aufs Wurt und a Hundemarkn hat er aa. Wolln S eahm habn? I muass eahm sofort wieder weggebn, wäul er se mit meiner Katz net vertragt.“

„Natürlich nimm i eahm!“, sagte Herr K. erfreut. „Auf d Nacht hol i eahm. I muass jetzt leida ins Gschäft gehn.“

„Na, na, der Hund muass sofort weg“, meinte Herr Cz. „Was glaubn S, was der mit meiner Katz aufführt! Ihna Bua is eh daham, i bring eahm gleich zu eich ume. Wann S auf d Nacht hamkumman, werdn S überrascht sein!“

Herr K. war einverstanden, bedankte sich vielmals und versprach, sich baldigst für den geschenkten Hund zu revanchieren.

Die Revanche bestand in einer Schadensersatzklage. Vor dem Zivilgericht sagte Herr K.: „Des war ja a Überraschung, wia i auf d Nacht hamkumma bin! I sperr de Tür auf, springt mi a Ungeheuer an. Momentan hab i glaubt, des is a Dinosaurier, dann bin i erst draufkumma, dass des der Hund is. I sag Ihna, Herr Richter, so was siecht ma normalerweise nur im Naturhistorischen Museum! Größer wia a Kalb, an Schädl wia a Bär und an Zodlpelz wia a alter Gaßbock. Und des Viech hat mir der Herr Cz. als reinrassichn Wolfshund in de Wohnung bracht.

Mei Bua war nimmer daham, und des Viech hat mi net in de Wohnung einelassn. Der hätt mi net vurbeilassn, wann i an Schriatt über de Schwelln gmacht hätt! Ka Chance hätt i ghabt.

In meiner Verzweiflung bin i zum Fleischhauer obe, hob an Kilo Knackwürscht kauft und hab eahm s nachanander beim Briafschlitz eineghaut. Wia er angfressn war, is er endlich in der Kuchl eingschlafn.

Wia i dann in mei Wohnung einegschlichn bin, hab i gsehn, dass mir der Hund drei Paar Schuach, an Wandteppich und an Bademantl zerbissn hat. Von de Klanichkeiten, was er ruiniert hat, will i gar net redn. Des muass alles der Herr Cz. zahlen! Der hat genau gwusst, warum er mir den Hund so schnell zuweschanzt!“

„I zahl nix“, erklärte Herr Cz. „Ma lasst kane Schuach umananderstehn. Bei dem Tier is ebn das Temperament der sibirischen Wölfe durchkumma. Des is sei Naturell.“

Die Verhandlung wurde zur Ladung des Herrn K. junior vertagt. Der Hund ist bereits bei seinem Besitzer, dem er aus dem Garten entlaufen war.